مراد آباد : سابق وزیر اعلی اکھلیش یادو سمیت 20 افراد کے خلاف ایف آئی آر درج کی گئی اور ان پر صحافیوں سے بدسلوکی کا الزام عائد کیا گیا۔اترپردیش کے مراد آباد میں ریاست کے سابق وزیر اعلی اور ایس پی کے قومی صدر اکھلیش یادو کی پریس کانفرنس میں ہوئی مارپیٹ کے معاملہ میں نیا موڑ آگیا ہے۔ مراد آباد میں اکھلیش یادو کے خلاف مقدمہ درج کیا گیا ہے۔ ان کے خلاف صحافیوں سے مار پیٹ کے معاملہ میں آئی پی سی کی دفعہ 147 ، 342 اور 323 کے تحت مقدمہ درج کیا گیا ہے۔ ادھر ایس پی ضلع صدر جے ویر سنگھ یادو نے بھی صحافیوں کے خلاف معاملہ درج کرایا ہے۔ پولیس نے مختلف دفعات کے تحت دو نامزد صحافیوں کے خلاف معاملہ درج کیا ہے۔دراصل ایس پی سپریمو اکھلیش یادو جمعرات کو مراد آباد پہنچے تھے۔ وہاں وہ ممبر اسمبلی محمد فہیم کے گھر پہنچے۔ اس دوران سابق وزیر اور ایس پی کارکنان کے درمیان نوک جھونک دیکھنے کو ملی۔ پھر پریس کانفرنس کے بعد اکھلیش یادو کے سامنے ہی ایس پی کارکنان کا دنگل دیکھنے کو ملا۔ اس دھکا مکی میں صحافی بھی پھنس گئے ، انہیں بھی چوٹیں آئی ہیں۔ ہنگامہ کے دوران کئی صحافیوں کے موبائل اور کیمرے بھی ٹوٹ گئے۔
