ڈھاکہ ۔26 مارچ (سیاست ڈاٹ کام) ایشین ہاکی فیڈریشن نے رواں سال جون میں ڈھاکہ میں کھیلا جانے والا جونیئر ایشیا کپ ہاکی ٹور نامنٹ ملتوی کردیا ہے۔ ایشین ہاکی فیڈریشن کے حکام نے کہا ہے کہ میزبان بنگلہ دیش ہاکی فیڈریشن نے کورونا وائرس کی وجہ سے موجودہ حالات میں اس ایونٹ کو آگے بڑھانے کی درخواست کی تھی ،جبکہ کئی ایشیائی ملکوں کے ہاکی حکام کو بھی اس بارے میں تشویش تھی۔ روایتی حریف پاکستان اور ہندوستان سمیت دس ملکوں کی ٹیموں کا یہ ایونٹ اب آئندہ سال ہوگا۔ جونیئر ہاکی کپ ڈھاکہ میں چار سے بارہ جون تک کھیلا جانا تھا، ایونٹ میں پاکستان، بنگلہ دیش، ہندوستان، جاپان، ملائیشیا، جنوبی کوریا، چین، تائیوان، عمان اور ازبکستان کی ٹیموں کو شرکت کرنا تھی۔ جونیئر ایشیا کپ اگلے سال ہندوستان میں ہونے والے جونیئر ورلڈکپ کا کوالیفائر ایونٹ بھی تھا۔ اس سے پہلے اذلان شاہ ہاکی کپ ٹورنمنٹ بھی کورونا وائرس کی وجہ سے ملتوی کر دیا گیا تھا۔ جس کا میزبان ملائیشیا ہے۔
