پیرس ۔ رواں اولمپکس کے دوران تنازعات میں الجھی الجزائر کی باکسر ایمان خلیف کے والد نے کہا ہے کہ ان کی بیٹی لڑکی ہے، اس کی پرورش لڑکیوں کی طرح ہوئی اور خاندان کی ہر دستاویز میں وہ بطور لڑکی ہی درج ہے۔ پیرس اولمپکس میں ایمان خلیف کے مقابل اطالوی باکسر کے باوٹ سے 46 سیکنڈز میں دستبردار ہو جانے کے بعد سے الجزائر کی باکسر تنازعہ کا شکار ہے جس میں ان کی خواتین باکسنگ کے مقابلوں میں شرکت کی اہلیت موضوع بحث بنی ہوئی ہے۔ اس معاملے پر ایمان خلیف کے والد عمار خلیف نے ایک فرانسیسی ٹی وی کو انٹرویو کے دوران خاندان کے دستاویزات بھی پیش کیں جس میں ایمان خلیف کی تاریخ پیدائش درج ہے اور ساتھ ان کا لڑکی ہونا تحریر ہے۔ عمار خلیف کے بموجب ان کی بیٹی ایک لڑکی ہے، جس کی پرورش لڑکیوں کی طرح ہی ہوئی ہے۔ باکسر کے والد نے مزید کہا کہ انہوں نے ایمان خلیف کو مضبوط اور بہادر ہونا سکھایا ہے۔ عمار خلیف نے تنازعات کا سبب بننے والی اطالوی باکسر کے بارے میں کہا کہ اطالوی حریف ان کی بیٹی کو شکست نہ دے سکی کیوں کہ وہ کمزور اور ایمان خلیف مضبوط ہے۔ انہوں نے اپنے خاندان کے دستاویزات دکھاتے ہوئے کہا کہ ان دستاویزات میں درج ہے کہ ایمان خلیف2 مئی 1999کو پیدا ہونے والی لڑکی ہے۔ 1999 میں رجسٹرڈ ہونے والی دستاویزات جھوٹ نہیں ہیں، ایمان خلیف الجزائر کی خواتین کیلئے ایک مثال ہے۔ انہوں نے کہا کہ اگر اللّٰہ نے چاہا تو ایمان خلیف الجزائر کیلئے گولڈ میڈل جیتے گی اور ملک کا پرچم بلند کرے گی اور یہی ان کا اور ان کے خاندان کا واحد اور ہمیشہ سے مقصد رہا ہے۔
