حسینی علم میں دلخراش واقعہ ۔ معاشی تنگدستی اصل وجہ
حیدرآباد۔پرانے شہر کے علاقہ حسینی علم میں ایک دلخراش واقعہ پیش آیا جس میں معاشی پریشانیوں کا شکار ایک ہی خاندان کے 3 افراد نے اجتماعی طور پر خودکشی کرلی۔ تفصیلات کے مطابق ڈی ششی کرن ساکن چندریکا پورم پرانا پل نے حسینی علم سے ایک شکایت درج کرائی جس میں کہا کہ ایک ہی خاندان کے تین افراد یعنی 38 سالہ کے مدھوسدن، 36 سالہ کے پریما لتا عرف پنکی اور 32 سالہ کے سندیپ عرف مٹو نے اپنے مکان میں پھانسی لے کر خودکشی کرلی۔ پولیس حسینی علم کی ٹیم نے مقام واردات پر پہنچ کر نعشوں کو مکان میں دیکھنے کے بعد انہیں بغرض پوسٹ مارٹم دواخانہ عثمانیہ کے مردہ خانہ منتقل کیا۔ بتایا جاتا ہے کہ انتہائی اقدام سے قبل متوفی کے سندیپ نے اپنے دوست گوپی سنگھ اور ششی کانت کو فون کرکے ایسا اشارہ دیا جس سے وہ سمجھ گئے کہ ان کا دوست انتہائی اقدام کرنے والا ہے۔ پولیس نے بتایا کہ مذکورہ افراد جنہوں نے اجتماعی خودکشی کی ہے مکان کی تعمیر اور دیگر اخراجات کیلئے 50 لاکھ تک کا قرض حاصل کیا تھا اور اس کی عدم ادائیگی سے وہ پریشان تھے اور خودکشی کرلی۔ پولیس حسینی علم نے اس سلسلہ میں مقدمہ درج کرلیا ہے۔
