پاور ہاؤز سنٹر کا قیام، تین ہزار ملازمتیں ، صدرنشین ڈاکٹر عرفان خاں کا بیان
حیدرآباد ۔ 20۔نومبر (سیاست نیوز) ای بی جی (EBG) گروپ نے حیدرآباد میں 7 ملین ڈالر کی سرمایہ کاری سے اسٹیٹ آف آرٹ پاور ہاوز سنٹر قائم کیا ہے جس میں حیدرآباد سے 350 اور دیگر ممالک سے 3000 افراد کو ایک سال میں ملازمت حاصل ہوگی۔ ویلنیس ، موبلیٹی ٹکنالوجی اور لائیف اسٹائل جیسے شعبوں میں خدمات انجام دینے والے ای بی جی گروپ نے حیدرآباد میں گلوبل ہیڈکوارٹر کے طور پر اپنی سرگرمیوں کا آغاز کیا ہے ۔ آئندہ دو برسوں میں 7 ملین امریکی ڈالر کی سرمایہ کاری کرتے ہوئے خدمات میں توسیع دی جائے گی۔ اس سنٹر کے ذریعہ 5000 سے زائد اسٹارٹ اپس کے قیام میں مدد دی جائے گی۔ ای بی جی نے 30 سے زائد برانڈ ایک چھت کے نیچے لانے کا کارنامہ انجام دیا ہے ۔ گروپ کے صدرنشین و بانی ڈاکٹر عرفان خاں نے بتایا کہ گروپ کی جانب سے مختلف شعبہ جات میں خدمات فراہم کی جائیں گی جن میں ویلنیس ، ہاسپٹلیٹی ، ایجوکیشن اور دیگر شعبہ جات شامل ہیں۔ ڈیجیٹل پروٹیکشن لیاب اور ویڈیو اسٹوڈیوز قائم کئے جائیں گے ۔ انہوں نے کہا کہ سنٹر کے تحت ابتداء میں حیدرآباد میں 350 ملازمین خدمات حاصل کی جائیں گی اور آئندہ ایک سال میں ملازمین کی تعداد بڑھ کر تین ہزار ہوجائے گی۔ ای بی جی گروپ کے تحت فی الوقت 311 ملازمین ہیں اور 11 ایچ آر ایجنسیاں اشتراک کر رہی ہیں۔ توسیعی منصوبہ کے ذریعہ نوجوانوں کے لئے روزگار کے مواقع میں اضافہ ہوگا۔1
