نئی دہلی: دہلی کے وزیر اعلی اروند کجریوال نے کہا کہ بلیک فنگس کے مریضوں کے علاج کے لئے دہلی کے تین اسپتالوں ایل این جے پی ، جی ٹی بی اور راجیو گاندھی سینٹر میں ڈیڈیکیٹیڈ ٹریٹمنٹ سینٹر بنائے جائیں گے اور اس سے بچاؤ کے سلسلے میں عوام میں بیداری پیدا کی جائے گی۔کجریوال نے جمعرات کو کیمپ دفتر میں ایک اعلی سطحی میٹنگ کی تھی تاکہ بلیک فنگس بیماری کے بڑھتے ہوئے اثرات کو روکا جاسکے ۔ اجلاس کے دوران بلیک فنگس کی روک تھام اور مریضوں کے علاج سے متعلق متعدد اہم فیصلے کیے گئے ۔ انہوں نے بتایا کہ بلیک فنگس کے مریضوں کے علاج کے لئے دہلی کے تین اسپتالوں ، ایل این جے پی ، جی ٹی بی اور راجیو گاندھی میں ڈیڈیکیٹیڈ ٹریٹمنٹ سینٹر قائم کیے جائیں گے ۔ دہلی کے عوام کو بلیک فنگس سے بچاؤ کے بارے میں بیدار کیا جائے گا۔ ملک کا دارالحکومت ہونے کی وجہ سے دہلی میں زیادہ تعداد میں مریض آسکتے ہیں۔ محکمہ صحت نے بتایا کہ بلیک فنگس کے مریضوں کے علاج معالجے کے لئے مناسب ادویات کا انتظام کیا جارہا ہے ۔
