نئی دہلی: وزیر اطلاعات نشریات پرکاش جاوڈیکر نے مغربی بنگال میں بی جے پی کے قومی صدر جگت پرکاش نڈا اور بی جے پی قائدین کے قافلے پر حملے کی مذمت کرتے ہوئے کہا ہے کہ مغربی بنگال میں جمہوریت کا قتل ہورہا ہے۔ جاوڈیکر نے یہاں صحافیوں سے گفتگو کرتے ہوئے کہا کہ مغربی بنگال کی ترنمول کانگریس کی حکومت اس حملے کی ذمہ دار ہے ۔ انہوں نے الزام لگایا کہ ترنمول کانگریس کے رہنما ایسے حملے کررہے ہیں۔ مغربی بنگال میں امن وامان ختم ہوگیا ہے ۔ ایسی صورتحال میں ہمارا مطالبہ یہ ہے کہ وزیر اعلی ممتا بنرجی امن و امان کو یقینی بنانے کی ذمہ داری لیں۔ کانگریس کے رہنما راہل گاندھی اور بائیں بازو سمیت تمام اپوزیشن جماعتیں بی جے پی پر حملے پر خاموش ہیں ، جو بدقسمتی ہے ۔
