کاماریڈی 26 نومبر (سیاست ڈسٹرکٹ نیوز)تلنگانہ پردیش کانگریس کمیٹی صدر مہیش کمار گوڑ نے کہا کہ مقامی اداروں کے انتخابات میں ووٹ لینے آنے والے اپوزیشن قائدین کو عوام سوالات کے کٹہرے میں کھڑا کریں۔ یہ کاماریڈی ضلع کے بھکنور میں ریاستی حکومت کے مشیر محمد علی شبیر کے ساتھ خواتین میں ساڑیاں تقسیم کرنے کے ایک پروگرام سے خطاب کر رہے تھے۔مسٹر مہیش کمار گوڑ نے اپنے خطاب میں کہا کہ خواتین کو بلا سود قرض فراہم کرنے کا اعزاز صرف کانگریس حکومت کو جاتا ہے۔ حکومت نے ضلع بھر کی خواتین تنظیموں کے لیے 1100 کروڑ روپے کے بلا سود قرض منظور کئے جن میں کاماریڈی اسمبلی حلقے کی خواتین انجمنوں کو تین کروڑ روپے سے زائد رقم قرض معافی کی گئی۔ انہوں نے کہا کہ حکومت ریاست کی ایک کروڑ خواتین کو مالی طور پر مضبوط بنانے کے عزم کے ساتھ 3 لاکھ 50 ہزار خود امدادی خواتین گروپس کو ایک بار پھر 304 کروڑ روپے کے بلا سود قرض دینے جا رہی ہے۔ یہ بلا سود قرضوں کی تیسری قسط ہے۔اس پروگرام میں ضلع کے ایڈیشنل کلکٹر وکٹر، ڈی آر ڈی اے پی ڈی سرینڈر، ضلع لائبریری کمیٹی چیئرمین مدّی چندرکانت ریڈی، ٹی پی سی سی کے جنرل سیکریٹری بدم اندراکرن ریڈی، ضلع این آر آئی کانگریس سیل کے صدر سدھاکر ریڈی، مقامی کانگریس قائدین اور دیگر معززین نے شرکت کی۔
