گلوبل سمٹ میں بی سی ویلفیر اسکیمات کی شمولیت، پونم پربھاکر کا جائزہ اجلاس
حیدرآباد ۔ 28۔نومبر (سیاست نیوز) وزیر بہبودی پسماندہ طبقات پونم پربھاکر نے کہا کہ پسماندہ طبقات کے تابناک مستقبل کیلئے تعلیم پر توجہ کی ضرورت ہے۔ پونم پربھاکر نے تلنگانہ رائزنگ گلوبل سمٹ کے ضمن میں بہبودی پسماندہ طبقات کے امور پر اعلیٰ عہدیداروں کے ساتھ اجلاس منعقد کیا۔ انہوں نے کہا کہ تلنگانہ کی آبادی میں پسماندہ طبقات 56 فیصد ہیں ۔ مختلف پیشوں سے وابستہ پسماندہ طبقات کی بھلائی کیلئے حکومت نے کئی اسکیمات متعارف کی ہے۔ سماجی انصاف کے تحت پسماندہ طبقات کو سیاسی شعبہ میں موثر نمائندگی دی جارہی ہے ۔ انہوں نے کہا کہ تعلیمی ، معاشی اور سماجی ترقی کے لئے حکومت کے سنجیدہ اقدامات کے ثمر آور نتائج برآمد ہوئے ہیں۔ تلنگانہ رائزنگ گلوبل سمٹ کے پسماندہ طبقات کی ترقی کی تفصیلات سے مندوبین کو واقف کرایا جائے گا۔ تلنگانہ رائزنگ ویژن ڈاکیومنٹ میں پسماندہ طبقات کی فلاح و بہبود کے لائحہ عمل کو شامل کیا جائے گا ۔ انہوں نے عہدیداروں سے کہا کہ وہ تعلیم ، فروغ انسانی وسائل اور دیگر شعبہ جات پر مبنی دستاویزی ریکارڈ تیار کریں۔ انہوں نے کہا کہ پسماندہ طبقات کے طلبہ کیلئے اقامتی اسکولس اور ہاسٹلس قائم کئے گئے ۔ بنیادی سطح سے اعلیٰ تعلیم تک پسماندہ طبقات کی حوصلہ افزائی کی جارہی ہے۔ انہوں نے کہا کہ تلنگانہ رائزنگ 2047 ڈاکیومنٹ ریاست کی ہمہ جہتی ترقی میں مددگار ثابت ہوگا۔ انہوں نے کہا کہ تعلیم کی ترقی کے ذریعہ ہی پسماندہ طبقات اپنے مستقبل کو تابناک بناسکتے ہیں۔ گلوبل سمٹ میں شامل کئے جانے والے مختلف امور کا جائزہ لیا۔ اجلاس میں پرنسپل سکریٹری بی سی ویلفیر سریدھر ، اقامتی اسکول سوسائٹی کے سکریٹری سیدلو ، ایڈیشنل ڈائرکٹر بی سی ویلفیر الوک شرما نے شرکت کی۔1
