لکھنؤ: سماج وادی پارٹی(ایس پی) کے قومی صدر و سابق وزیر اعلی اکھلیش یادو نے الزام لگایا کہ بی جے پی حکومت سرکاری اداروں کا پرائیویٹائزیشن کرکے نوکریاں اور ریزرویشن ختم کرنے کی سازش کررہی ہے ۔ ساتھ ہی بی جے پی حکومت لوٹ، جھوٹ و بے ایمانی کی پالیسی پر کام کررہی ہے ۔ یادو نے اتوار کو یہاں جاری بیان میں کہا کہ پہلے مرکز کی بی جے پی حکومت نے کئی سرکاری اداروں کو پرائیویٹ ہاتھوں میں سونپا، اب اسی راہ پر چلتے ہوئے اترپردیش کی بی جے پی حکومت بھی پرائیویٹائزیشن کو فروغ دے رہی ہے ۔ بی جے پی حکومتیں سرمایہ کاروں کے لئے کام کرتی ہیں۔ اترپردیش کی بی جے پی حکومت پوروانچل اور دکشنانچل وددت نگم کو پرائیویٹ ہاتھوں میں دینے پر آمادہ ہے ۔
حکومت پرائیویٹائزیشن کی آڑ میں اربوں کی املاک سرمایہ داروں کو دینا چاہتی ہے ۔ یادو نے کہا کہ بی جے پی حکومت آئین اور ریزرویشن مخالف ہے ۔ بی جے پی پی ڈی اے کو نوکریوں اور ریزرویشن سے دور کرنے کے لئے ہر دن نئی نئی سازش کررہی ہے ۔ بی جے پی کی پالیسی پی ڈی اے مخالف ہے ۔ وہ پی ڈی اے سے نفرت کرتی ہے ۔ نجاری سے سرکاری نوکریاں ختم ہوجاتی ہیں۔ پرائیویٹ شعبے من مانی کر کے مہنگائی بڑھاتے ہیں جس کا اثر عوام پر پڑتا ہے ۔ اس کے ساتھ ہی سرکاری اداروں کے پرائیویٹ شعبے میں چلے جانے سے پی ڈی اے کو بابا صاحب ڈاکٹر بھیم راؤ امبیڈکر کے ذریعہ آئین میں دئیے گئے ریزرویشن کا موقع نہیں ملتا ہے ۔
