بھوپال۔ کانگریس کے سینئر لیڈر کمل ناتھ نے آج برسراقتدار بھارتیہ جنتاپارٹی پر ووٹروں کو متاثر کرنے اور سرکاری مشینری کا غلط استعمال کرنے کا الزام لگاتے ہوئے کہا کہ اس کے برعکس وہ ہم پر الزام لگا رہی ہے ۔ کمل ناتھ نے وزیراعلی شیو راج سنگھ چوہان کے الزامات کے بعد ٹوئٹ کے ذریعہ کہا کہ چاروں ضمنی انتخابات والے حلقوں میں بی جے پی کے لوگ ووٹروں کو متاثر کررہے ہیں۔ انہیں لالچ دیا جا رہا ہے اور کئی پولنگ سٹیشنوں پر کانگریس کے لوگوں کو ڈرایا جا رہا ہے ۔ وہ پہلے ہی یہ بات کہہ رہے ہیں کہ بی جے پی سرکاری مشینری کا غلط استعمال کر رہی ہے ۔
مرکز اور ریاست میں بی جے پی کی حکومت ہے ۔ انہوں نے کہا کہ لیکن جمہوریت میں عوام ہی سب سے بڑی طاقت ہوتے ہیں اور آج عوام سچ کے ساتھ کھڑے ہیں۔ انہوں نے دعویٰ کیا کہ آج لوگ بی جے پی کو گھر بھیجنا چاہتے ہیں۔ بی جے پی کتنی ہی چالیں چل لے ، جیت سچائی اور کانگریس کی ہی ہوگی۔ ریاستی کانگریس صدر نے کہا کہ چوہان پرتھوی پور اسمبلی حلقہ کی بات کر رہے ہیں، لیکن سچائی یہ ہے کہ بی جے پی نے پولنگ ختم ہونے سے کچھ دیر پہلے اس طرح سے اپنی شکست قبول کر لی ہے ۔
