لاک ڈاؤن سے خون کی عدم دستیابی ، رضاکارانہ عطیہ دہندگان کو آمد و رفت کی سہولت
حیدرآباد۔10اپریل(سیاست نیوز) لاک ڈاؤن کی صورتحال میں عوام کو ہونے والی مشکلات کے ازالہ کیلئے کئی ایک تنظیموں اور ادارہ سرگرم عمل ہیں اور لوگوں کی بھوک مٹانے کے علاوہ انہیں راشن کی فراہمی کے اقدامات کے ساتھ ادویات کی فراہمی کو یقینی بنایا جا رہاہے لیکن عوام کے مختلف طبقات میں ایک ایسا طبقہ بھی ہے جسے ماہانہ دو مرتبہ خون کی ضرورت ہوتی ہے ۔ تھلیسمیا کے متاثرین کا بھی کوئی علاج نہیں ہے لیکن اس مرض کے متاثرین کو خون کا عطیہ دیتے ہوئے ان کی زندگی کو بچایا جاسکتا ہے اور شہر حیدرآباد میں لوگ فراخ دلی کے ساتھ راشن‘ غذاء اور ادویات کا تو انتظام کر رہے ہیں لیکن تھیلیسمیا کے ان مریضوں کی خون کی ضرورت کو پورا کرنے میں بڑی دشواریوں کا سامنا کرنا پڑرہا ہے اور کہا جا رہا ہے کہ لاک ڈاؤن کے باعث ان مریضوں کے لئے خون کا حصول سنگین مسئلہ بنتا جا رہاہے اور اس مسئلہ کا واحد حل خون کے عطیہ کیلئے شہریوں کا آگے آنا ہی ہے ۔ ان تھلیسمیا کے مریضوں کو ہونے والی مشکلات کو دور کرنے کے لئے وزیر انفارمیشن ٹکنالوجی تلنگانہ مسٹر کے ٹی راما راؤ نے محکمہ پولیس کے عہدیداروں کو ہدایات جاری کرتے ہوئے انہیں اس بات کا پابند بنایا کہ خون کا عطیہ دینے والوں کو راستہ فراہم کیاجائے اور تھیلیسمیا کے مریضوں کے لئے راحت رسانی کے اقدامات کئے جائیں اور اسی طرح وزیر تلنگانہ صحت مسٹر ایٹالہ راجندر نے عوام سے اپیل کی کہ وہ تھلیسمیا کے مریضوں کو جنہیں ماہانہ دو مرتبہ خون کی ضرورت ہوتی ہے ان کیلئے خون کا عطیہ دیں تاکہ ان مریضوں کی مدد کو یقینی بنایا جاسکے۔ تھلیسمیا اسکل کئیر سوسائٹی نے بتایا کہ عام ایام کے دوران سوسائٹی کی جانب سے خون کا عطیہ کیمپ منعقد کرتے ہوئے اس ضرورت کو پورا کیا جاتا تھا لیکن اب جو صورتحال ہے اس صورتحال میں خون کے عطیہ کیمپوں کے انعقاد کی اجازت منسوخ کردی گئی ہے اور کسی بھی کیمپ کے انعقاد کی اجازت فراہم نہیں کی جا رہی ہے اسی لئے تھلیسمیا کئیر سوسائٹی کی جانب سے عطیہ دہندگان کو سفری سہولت فراہم کی جا رہی ہے او ر انہیں گھر سے بلڈ بینک اور بلڈ بینک سے گھر تک پہنچانے کے اقدامات کئے جا رہے ہیں۔جناب مرزا علیم بیگ نے بتایا کہ جو عطیہ دہندگان تھلیسمیاکے مریضوں کے لئے خون کا عطیہ دینا چاہتے ہیں وہ 9246534913 پر ربطہ کرسکتے ہیں۔ انہوں نے بتایا کہ خون کے عطیہ کے حصول کے دوران سوسائٹی کی جانب سے سماجی فاصلہ اور دیگر احکامات بالخصوص صاف صفائی کا خصوصی خیال رکھا جا رہاہے۔
