روڈ میاپ تیار کرنے عہدیداروں کو ہدایت، گلوبل سمٹ پر چیف منسٹر ریونت ریڈی کا اعلیٰ سطحی اجلاس
حیدرآباد ۔ 28۔نومبر (سیاست نیوز) چیف منسٹر ریونت ریڈی نے تلنگانہ کی تیز رفتار ترقی کے لئے ریاست کو تین مختلف ریجنس میں تقسیم کرنے کی ہدایت دی ہے ۔ حکومت کی جانب سے تینوں علاقوں کے لئے معاشی ترقی کے نشانے مقرر کئے جائیں گے ۔ چیف منسٹر نے گلوبل سمٹ کے سلسلہ میں عہدیداروں کے ساتھ اعلیٰ سطحی اجلاس منعقد کیا جس میں 2034 تک ریاست کی معیشت کو ایک ٹریلین ڈالر جبکہ 2047 تک 3 ٹریلین ڈالر معیشت کی تیاری کیلئے روڈ میاپ تیار کرنے کی ہدایت دی گئی۔ چیف منسٹر نے کہا کہ معاشی ترقی کیلئے تین علحدہ ریجن تشکیل دیئے جائیں گے جن میں کور اربن ریجن معیشت، نیم شہری ریجن معیشت اور رورل اگریکلچرل ریجن معیشت شامل ہیں۔ چیف منسٹر نے عہدیداروں کو تین علحدہ معاشی زونس کی تشکیل کے لئے منصوبہ بندی کرنے کی ہدایت دی۔ انہوں نے کہا کہ ریاست کے تمام علاقوں میں یکساں طور پر معاشی ترقی کو یقینی بنایا جائے۔ انہوں نے کہا کہ ترقیاتی اسکیمات میں کسی بھی رکاوٹ کو روکنے کے لئے تین علحدہ معاشی زونس کی تشکیل کا فیصلہ کیا گیا ہے۔ مقامی ضروریات کو پیش نظر رکھتے ہوئے تین علحدہ روڈ میاپ تیار کئے جائیں گے ۔ چیف منسٹر نے کہا کہ آئندہ 22 برسوں کی سرگرمیوں کو پیش نظر رکھتے ہوئے ویژن 2047 ڈاکیومنٹ تیار کیا جارہا ہے۔ حکومت نے بھارت فیوچر سٹی کے قیام کا فیصلہ کیا جہاں 8 اور 9 ڈسمبر کو گلوبل سمٹ منعقد ہوگا۔ ریاستی وزراء کومٹ ریڈی وینکٹ ریلای ، پی سرینواس ریڈی ، سریدھر بابو ، محمد اظہرالدین ، سیتکا ، چیف سکریٹری رام کرشنا راؤ اور دوسرے اجلاس میں شریک تھے۔ اجلاس میں عہدیداروں نے گلوبل سمٹ کی تیاریوں سے واقف کرایا چیف منسٹر نے کہا کہ فیوچر سٹی میں صنعتی سرگرمیوں کو فروغ دینے کیلئے قومی اور بین الاقوامی صنعت کاروں کو شرکت کی دعوت دی گئی ہے۔ سمٹ میں تلنگانہ رائزنگ ویژن 2047 جاری کیا جائے گا جو ریاست کی مجموعی ترقی کے منصوبہ کی عکاسی کرے گا۔ چیف منسٹر نے کہا کہ فارما ، لائیف سائنسیس، ٹکنالوجی ، آرٹیفشل انٹلیجنس ، ٹورازم اور دیگر شعبہ جات میں آئندہ دو دہوں تک جامع ترقیاتی منصوبہ تیار کیا جارہا ہے ۔ حکومت نے بلیو اینڈ گرین حیدرآباد کے عنوان سے شہر کی ترقی کا خاکہ تیار کیا ہے جس کے تحت 2959 تالابوں اور جھیلوں کا تحفظ کیا جائے گا ۔ چیف منسٹر نے اسکل ڈیولپمنٹ کیلئے حکومت کے اقدامات اور حیدرآباد ، ورنگل اور کریم نگر میں اسپورٹس ولیجس کے قیام سے واقف کرایا۔ انہوں نے کہا کہ حیدرآباد کو انفراسٹرکچر کی ترقی کے شعبہ میں عالمی شہر کے طور پر شناخت حاصل ہوگی۔1
