حیدرآباد 20 نومبر (سیاست نیوز) سابق چیف منسٹر آندھراپردیش وائی ایس جگن موہن ریڈی جمعرات کو نامپلی میں سی بی آئی کی خصوصی عدالت میں پیش ہوئے۔ یہ پیشی عدالت کے اس حالیہ حکم کی تعمیل میں ہوئی جس میں انہیں طویل عرصے سے جاری غیر محسوب اثاثہ جات (ڈی اے) کیس کی سماعت کیلئے شخصی طور پر حاضر ہونے کی ہدایت دی گئی تھی۔ عدالتی کارروائی سے قبل جگن موہن ریڈی کی شخصی حاضری سے استثنیٰ کی درخواست واپس لی گئی تھی، جس کی سی بی آئی نے مخالفت کی تھی۔ عدالت نے آئندہ سماعت 28 نومبر کو مقرر کی جبکہ جگن موہن ریڈی کی جانب سے دائر ڈسچارج پٹیشن زیر غور ہے۔ یہ مقدمہ 10 سال سے زائد پرانا ہے اور اس کا تعلق مبینہ طور پر ’کوئیڈ پرو کو‘ سرمایہ کاریوں سے ہے جو خانگی کمپنیوں اور سرمایہ کاروں نے جگن موہن ریڈی کی کمپنیوں میں اس وقت کیں جب ان کے والد آنجہانی راج شیکھر ریڈی آندھرا پردیش کے چیف منسٹر تھے۔ اُن سرمایہ کاریوں کے بدلے سرکاری سہولتیں اور مراعات دینے کے الزامات ہیں۔ جگن کی عدالت آمد کے موقع پر حیدرآباد پولیس سے سخت سیکورٹی انتظامات کئے گئے۔ وہ بیگم پیٹ ایئرپورٹ پہونچے جہاں سے سخت سکیوریٹی میں نامپلی کورٹ پہونچے۔ پولیس نے ان کے قافلے کیلئے ٹریفک تحدیدات عائد کی تھیں جس سے ٹریفک متاثر ہوئی۔ب
کورٹ میں جگن کا سنیتا سے سامنا
حیدرآباد 20۔نومبر (سیاست نیوز) نامپلی سی بی آئی عدالت میں سابق چیف منسٹر جگن موہن ریڈی کی پیشی پر ان کا سامنا کٹر حریف اور وائی ایس ویویکانند کی دختر سنیتا سے ہوا۔ جگن موہن ریڈی جس وقت عدالت میں پیش ہونے پہنچے ، اسی وقت آنجہانی ویویکانند ریڈی کی دختر سنیتا وہاں موجود تھیں۔ وہ اپنے والد ویویکانند ریڈی قتل معاملہ کی جانچ کیلئے عدالت میں حاضر تھے۔ ایک مرحلہ پر دونوں کا سامنا ہوا لیکن وہ انجان بن کر آگے بڑھ گئے۔ ویویکانند قتل کیس میں آج تین ملزمین کی جرح کے خلاف سنیتا نے اپنا موقف پیش کیا۔ عدالت میں دونوں مقدمات کی سماعت کے بعد جگن اور سنیتا عدالت سے روانہ ہوگئے۔1
