دبئی ۔متحدہ عرب امارات کا سب سے بلند ریسٹورنٹ یکم اکتوبر 2020ء کو راس الخیمہ کی جیس ایڈونچر چوٹی پر کھول دیا جائے گا۔اماراتی خبر رساں ایجنسی وام کے مطابق راس الخیمہ کے مقام پر سطح سمندر سے 1484 میٹر بلندی کے مقام پر راس الخیمہ تفریح کی جانب سے بنایا جانے والا ریسٹورنٹ متحدہ عرب امارات کا سب سے بلند ریسٹورنٹ ہوگا۔ اس ریسٹورنٹ کا نام بلندی کی مناسبت سے 1484 رکھا گیا ہے۔بیان کے مطابق ریسٹورنٹ کے افتتاح کے موقع سے ہی عالمی ادارہ صحت اور دیگر بین الاقوامی اداروں کی جانب سے طے کردہ اصولوں کے تحت صفائی اورصحت کے تحفظ کے معیارکو یقینی بنایا جائے گا۔کورونا وائرس کے سبب سماجی فاصلے کی شرائط پوری کرنے کے بعد ریسٹورنٹ میں 76 افراد کے بیٹھنے کی جگہ مقررکی گئی ہے۔ ریسٹورنٹ میں بیٹھے لوگ جیس ایڈونچر چوٹی اورحجرکی پہاڑیوں کا منظر دیکھ سکیں گے۔راس الخیمہ تفریحی کمپنی کی سربراہ الیسن گرنل کے مطابق جبل جیس راس الخیمہ کا ایک مقبول سیاحتی مقام ہے۔ اس مقام پر سال بھر مقامی اور بیرونی سیاح آتے ہیں تاکہ وہ دلفریب مناظر سے خوشگوار یادیں وابستہ کر سکیں۔
