نئی دہلی۔6 جنوری ۔(سیاست ڈاٹ کام) کانگریس نے جواہر لال نہرو یونیورسٹی (جے این یو) میں اتوار کی رات ہوئے تشدد کیلئے وزیر اعظم نریندر مودی اور وزیر داخلہ امت شاہ کو ذمہ دار ٹھہرایا اور الزام لگایا کہ اس طرح حکومت اسپانسر تشدد کرکے یونیورسٹیوں میں خوف کا ماحول پیدا کیا جا رہا ہے ۔کانگریس جنرل سکریٹری پرینکا گاندھی نے آج کہا کہ دنیا میں ہندوستان کی تصویر ایک لبرل جمہوری ملک کی ہے ۔ مودی ۔شاہ کے غنڈے یونیورسٹیوں میں توڑ پھوڑ کر رہے ہیں اور اپنے روشن مستقبل کی تیاریوں میں لگے طالب علموں میں خوف پیدا کیا جا رہا ہے ۔ گاندھی نے کہا کہ ایمس میں داخل جے این یو کے زخمی طالب علموں نے اُنہیں بتایا کہ لاٹھی اور ہتھیاروں سے لیس غنڈوں نے احاطے میں گھس کر فساد برپا کیا جس سے بہت سے طالب علموں کو گہری چوٹیں آئی ہیں۔ ایک طالب علم نے یہ تک کہا کہ پولیس نے اسے کئی لاتیں ماریں۔بعد میں کانگریس میڈیا سیل کے سربراہ رندیپ سرجے والا نے صحافیوں سے کہا کہ جے این یو میں کل رات حکومت اسپانسر تشدد ہوا جو مودی ۔شاہ کے اشارے پر ہوا ہے ۔
