ممبئی : بھارتی جنتا پارٹی اقلیتی مورچہ کے صدر جمال صدیقی کشمیری دہشت گردوں کے نشانے پر ہیں اور حزب المجاہدین جموں وکشمیر نامی تنظیم نے انہیں خطرناک نتائج کی دھمکی دی ہے جس کی شکایت آج یہاں بی جے پی صدرنے مرکزی وزیر داخلہ امت شاہ سے کی ہے اور اس معاملے میں فوری کارروائی کرنے کا مطالبہ کیا ہے ۔مہاراشٹرکے سنتروں کے شہر ناگپورسے تعلق رکھنے والے جمال صدیقی ریاست میں بی جے پی حکومت میں حج کمیٹی کے چیئرمین کے عہدے پر فائز تھے اور ا نہیں مہاراشٹرمیں سیکورٹی فراہم کی گئی تھی جو انہیں آج بھی ریاست میں دستیاب ہے ۔ لیکن بیرون ریاست جانے کے بعد ان کی سیکورٹی ہٹا لی جاتی ہے ۔امت شاہ کو لکھے گئے خط کے امرا انہوں نے حزب المجاہدین نامی تنظیم کے دھمکی آمیز خط کی نقل بھی پیش کی ہے جس میں اردو میں انہیں جان سے مارنے کی دھمکی دی گئی ہے اور آزادی کشمیر کی حمایت کرتے ہوئے کشمیر میں جاری مبینہ مظالم کا تذکرہ کیا گیا ہے اور انہیں مشورہ دیا گیا ہے کہ وہ بی جے پی سے مستعفی ہو کر سچے دل سے توبہ کریں ۔یہ دھمکی آمیز خط جمال صدیقی کو 9؍اکتوبر کو بی جے پی اقلیتی مورچہ کے قومی سیکریٹری سید صحافت حسین کی سری نگرمیں واقع رہائش گاہ پر بذریعہ پوسٹ روانہ کیا گیا تھا۔ اور اسکی شکایت سید صحافت حسین نے مقامی پولس میں بھی کردی ہے ۔جمال صدیقی نے کہا کہ وہ اپنی پارٹی کے پروگراموں کیلئے پورے ملک کا دورہ کرتے ہیں نیز اس قسم کی دھمکیوں وہ ڈرنے والے نہیں ہے اور انہیں اس بات کا یقین ہے کہ مارنے والے سے بچانے والا بڑا ہوتا ہے ۔