واشنگٹن ۔ 17 جنوری (سیاست ڈاٹ کام) امریکہ میں مقیم مسلمان عراقی پناہ گزین خاتون دالیا العقیدی کا کہنا ہے کہ وہ مینی سوٹا ریاست سے تعلق رکھنے والی ڈیموکریٹک رکن پارلیمنٹ الہان عمر کی باتوں سے تنگ آ چکی ہیں۔ دالیا کے مطابق الہان سیاسی شناخت کے معاملے کے ساتھ کھلواڑ کر رہی ہیں اور ایسی زبان کا استعمال کرتی ہیں جو دالیا کے نزدیک امریکہ کو “تقسیم” کر رہا ہے۔ لہذا اب دالیا نے اپنی انتخابی مہم کا اعلان کر دیا ہے تا کہ نومبر میں وہ الہان عمر کو مات دے سکیں۔امریکی چینل Fox News کو ٹیلی فون پر دیے گئے انٹرویو میں دالیا کا کہنا تھا کہ “اسے (الہان عمر کو) روکنے کی ضرورت ہے اور میں سمجھتی ہوں کہ مجھ میں اتنی طاقت ہے جو اسے شکست سے دوچار کرنے کے لیے کافی ہو”۔ریپبلکن پارٹی سے تعلق رکھنے والی دالیا القیدی ڈیموکریٹک رکن پارلیمنٹ الہان عمر کی نشست حاصل کرنے کی خواہش مند ہیں۔دالیا نے انتخابی مہم میں شناخت کی پالیسی استعمال کرنے پر نکتہ چینی کی۔ ان کا کہنا تھا کہ “مسلمان، عیسائی اور یہودی سب ہی امریکی ہیں”۔دالیا کے مطابق الہان جب بھی اپنی زبان کھولتی ہیں تو وہ امریکہ دشمنی یا یہود دشمنی میں کچھ نہ کچھ ضرور کہتی ہیں۔ دالیا نے کہا کہ “میں اس ملک کی وفادار ہوں جس نے مجھے موقع فراہم کیا اور زیادہ روشن مستقبل دیا”۔ انہوں نے کہا کہ الہان عمر مسلسل ملک کو کمزور کرنے اور اسے تقسیم کرنے کی کوشش کر رہی ہیں۔دالیا العقیدی کو صحافت کے میدان میں 31 سال کا تجربہ ہے۔
