حیدرآباد 25نومبر(یواین آئی) محکمہ موسمیات حیدرآباد نے اعلان کیا ہے کہ جنوب مشرقی خلیج بنگال میں موجود شدید کم دباؤ کے طوفان کی شکل اختیار کرنے کا امکان ہے ۔ محکمہ موسمیات کے عہدیدارسری نواس راؤ کے مطابق طوفان کی سمت اور ساحل سے اس کے ٹکرانے کے مقام کی مکمل وضاحت آج رات گہرے دباؤ میں تبدیل ہونے کے بعد ہی سامنے آئے گی۔کم دباؤ کا یہ نظام فی الحال شمال مغربی سمت میں سست روی سے آگے بڑھ رہا ہے ۔ آئندہ 24 گھنٹوں میں یہ گہرے دباؤ اور اس کے بعد طوفان میں تبدیل ہو سکتا ہے ۔طوفان یا تو سمندر میں بہت دور شمال مغرب کی جانب بنگلہ دیش کی طرف نکل سکتا ہے ، یا پھر ساحلی آندھرا پردیش سے متصل ہو کر شمال مغرب کی سمت پیشقدمی کر سکتا ہے ۔انہوں نے واضح کیا ہے کہ تلنگانہ پر اس طوفان کا اثر بہت کم رہنے کا امکان ہے ۔ اگر یہ ساحلی آندھرا پردیش کے قریب سے گزرتا ہے تو ریاست کے مشرقی اضلاع جیسے بھدرادری کوتہ گوڑم، کھمم، جے شنکر بھوپال پلی، مُلگ، ورنگل اور محبوب آباد میں آئندہ پانچ سے سات دنوں کے دوران معمولی بارش ہو سکتی ہے ۔ اگر یہ دور سے گزرتا ہے تو تلنگانہ میں بارش کا کوئی اثر نہیں ہوگا۔ حالیہ دنوں میں آئے طوفان مونتھا کے اثرات کی وجہ سے ریاست میں سردی کی شدت میں کمی آئی ہے اور درجہ حرارت میں اضافہ ہوا ہے ۔ شہر حیدرآباد کے بیگم پیٹ آبزرویٹری میں گذشتہ تین دن سے درجہ حرارت 19 ڈگری درج ہو رہا ہے ۔انہوں نے پیش گوئی کی ہے کہ دسمبر اور جنوری کے مہینے سردی کے لئے مشہور ہیں۔ موجودہ موسمی نظام طوفان کے اثرات ختم ہونے کے بعد یکم دسمبر یا 2 دسمبرسے شمالی ہندوستان سے ٹھنڈی ہوائیں دوبارہ آنا شروع ہو جائیں گی۔
