حیدرآباد : خود کو پولیس ظاہر کرتے ہوئے عوام کو لوٹنے دھمکانے اور جبراً وصولی کرنے والے ملزم پر پی ڈی ایکٹ نافذ کردیا گیا ہے۔ کمشنر پولیس رچہ کنڈہ مہیش بھگوت نے آج اس سلسلہ میں احکامات کو جاری کردیا۔ پولیس کے مطابق 29 سالہ رماوت رمیش رکن رمنتاپور کے خلاف پی ڈی ایکٹ نافذ کردیا۔ رمیش کے خلاف دوسری مرتبہ پی ڈی ایکٹ نافذ کیا گیا۔ کئی مرتبہ جیل کی سزاء کاٹنے کے باوجود اس کے رویہ میں کوئی تبدیلی نہیں آئی۔ سال 2019ء میں اس کے خلاف پی ڈی ایکٹ نافذ کیا گیا تھا۔ رمیش کل (16) وارداتوں میں ملوث ہے جس میں جبراً وصولی اور فرضی پولیس کے نام پر خود کو پولیس ظاہر کرتے ہوئے رہزنی اور سرقہ کی وارداتیں انجام دیں۔ جنوری 2021ء میں تین دن کے دوران اس نے دو وارداتیں انجام دی تھیں۔ ایل بی نگر پولیس نے 16 اپریل کو اسے گرفتار کیا تھا اور آج اس کے خلاف پی ڈی ایکٹ نافذ کیا گیا۔
