نئی دہلی 25جنوری (سیاست ڈاٹ کام ) ہندوستان او رجنوبی افریقہ نے دفاع، کاروبار ، اسکل ڈیولپمنٹ اور ٹکنالوجی سمیت دیگر شعبوں میں تعاون میں اضافہ کرنے کے لئے تفصیلی تبادلہ خیال کیا۔وزیر اعظم نریندر مودی نے 70ویں یوم جمہوریہ کی سب سے اہم تقریب کے مہمان خصوصی افریقہ کے صدر سیرل رامافوسا کے ساتھ حیدرآباد ہاوس میں وفد کی سطح پر میٹنگ میں ان خیالات کا اظہار کیا۔ وزارت خارجہ کے افسران کے مطابق دونوں ملکوں نے دفاع اور سیکورٹی، تجارت اور سرمایہ کاری، اسکل ڈیولپمنٹ ، سائنس اور ٹکنالوجی، تعلیم اور تکنیکی تعاون اور باہمی فورموں پر تعاون میں اضافہ کرنے پر تفصیلی تبادلہ خیال کیا۔ مسٹر مودی نے بعد میں اپنے بیان میں کہا کہ ہندوستان کے دیرینہ دوست صدر راما فوسا کے لئے ہندوستان نیا نہیں ہے لیکن صدر کے طور پر یہ ان کا ہندوستان کا پہلا دورہ ہے او ران کا یہ دورہ ہمارے تعلقات کے ایک خصوصی موقع پر ہورہا ہے ۔انہوں نے کہا کہ اس سال مہاتما گاندھی کی 150ویں سالگرہ ہے جب کہ گذشتہ سال جنوبی افریقہ کے عظیم رہنما نیلسن منڈیلا کی صد سالہ سالگرہ کا تھا۔ گذشتہ سال ہی دونوں ملکوں کے سفارتی تعلقات کی سلور جوبلی بھی تھی۔وزیر اعظم نے کہا کہ مجھے بہت خوشی ہے کہ اس خصوصی موقع پر صدررامافوسا ہندوستان آئے ہیں۔ ان کا یہ ہندوستان کا دورہ ہمارے لئے اس لئے بھی خصوصی اہمیت کا حامل ہے کیوں کہ کل وہ ہندوستان کی یوم جمہوریہ تقریب میں مہمان خصوصی کے طور پر شامل ہوں گے ۔
سبری ملا تنازعہ ، نیشنل ایوارڈ جیتنے والے ملیالم فلم ڈائرکٹر پر حملہ
تھریسر 25 جنوری (سیاست ڈاٹ کام) نیشنل ایوارڈ جیتنے والے ملیالم فلم ڈائرکٹر پرنیا نندن نے آج دعویٰ کیاکہ ان پر حملہ کیا گیا اور گائے کا گوبر اور پیشاب بھی ان پر پھینکا گیا۔ انھوں نے کہاکہ سبری ملا میں خواتین کے داخلے کے مسئلہ پر ان کے قابل اعتراض فیس بُک پوسٹ کے چند دن بعد یہ واقعہ پیش آیا۔
اس حملہ میں بی جے پی، آر ایس ایس ورکرس کا ہاتھ ہونے کا شبہ ظاہر کیا ہے تاہم بی جے پی نے اس حملہ میں کسی رول کی تردید کی ہے۔