ممبئی، 21 ستمبر (یو این آئی) دہلی کے سابق کپتان متھن منہاس بی سی سی آئی کے اگلے صدر بننے کیلئے تیار ہیں۔ بی سی سی آئی کے مختلف عہدوں کیلئے کاغذات نامزدگی داخل کرنے کی آخری تاریخ سے ایک دن پہلے ، ہفتہ تک، منہاس صدر کے عہدہ کی دوڑ میں واحد نام تھے ، جو اس سال اگست میں ہندوستان کے سابق آل راؤنڈر راجر بنی کے استعفیٰ دینے کے بعد سے خالی ہے ۔ بی سی سی آئی کے نائب صدر راجیو شکلا اس وقت سے عبوری طورپر اس عہدہ پر فائز تھے ۔ بی سی سی آئی عہدیداروں میں ایک اور کرکٹر کا نام شامل ہونے کا امکان ہے ۔ کرناٹک اور ہندوستان کے سابق اسپنر رگھورام بھٹ ٹریژرر کا عہدہ سنبھالیں گے ۔ بھٹ فی الحال کرناٹک اسٹیٹ کرکٹ ایسوسی ایشن کے صدر ہیں۔ منہاس، جو اکتوبر میں 46 سال کے ہو جائیں گے ، جموں و کشمیر کرکٹ ایسوسی ایشن کے آپریشن کیلئے بی سی سی آئی کی جانب سے مقرر کردہ ذیلی کمیٹی کا حصہ ہیں۔ جموں میں پیدا ہوئے منہاس 2015 میں دہلی سے جموں و کشمیر چلے گئے تھے اور اس کے اگلے ہی سال ریٹائر ہوگئے ۔ اس کے بعد سے انہوں نے مختلف ٹیموں کے ساتھ بطور کوچ کام کیا، جس میں بنگلہ دیش مینس انڈر 19 ٹیم کے بیٹنگ کنسلٹنٹ کے ساتھ ساتھ آئی پی ایل کی ٹیموں میں کنگز الیون پنجاب (اب پنجاب کنگز)، رائل چیلنجرز بنگلور، اور گجرات ٹائٹنز کیلئے بھی کام کیا۔ ہندوستانی ڈومیسٹک کرکٹ کے لجنڈ، منہاس نے 1997-98سے 2016-17 تک 157 فرسٹ کلاس میچ کھیلے ، جس میں 9714 رنز بنائے ۔ 130لسٹ اے میچوں میں 4126 رنز بنائے ۔ اور 91 ٹی ٹوئنٹی میچوں میں 1170 رنز بنائے ۔ ای ایس پی این کرک انفوکو معلوم ہوا ہے کہ منہاس کا نام ہفتہ کو دہلی میں ایک غیر رسمی میٹنگ میں سامنے آیا جس میں بی سی سی آئی کے کچھ سرکردہ سابق اور موجودہ ارکان نے شرکت کی، جن میں موجودہ صدر آئی سی سی جے شاہ، راجیو شکلا، بی سی سی آئی سکریٹری دیواجیت سائکیا، دہلی اور ڈسٹرکٹ کرکٹ ایسوسی ایشن کے صدر روہن جیٹلی اور بورڈ کے سابق سکریٹری نرنجن شاہ شامل تھے ۔ مختلف عہدوں کیلئے انتخابات 28 ستمبر کو ممبئی میں بی سی سی آئی کی سالانہ جنرل میٹنگ میں ہونے والے ہیں۔ تاہم، اگر اتوار کے آخر تک کوئی نئی نامزدگی داخل نہیں کی جاتی ہے ، تو دہلی میٹنگ میں زیر بحث ناموں کے حتمی ہونے کی امید ہے۔ سائکیا، جنہوں نے جنوری میں جے شاہ کی جگہ بی سی سی آئی سکریٹری کا عہدہ سنبھالا تھا، ممکن ہے اس عہدہ پر برقرار رہیں گے ، جبکہ راجیو شکلا بھی نائب صدر برقرار رہیں گے ۔ چھتیس گڑھ اسٹیٹ کرکٹ ایسوسی ایشن کے پربھتیج بھاٹیہ، جو جنوری میں خزانچی منتخب ہوئے تھے ، گوا کرکٹ ایسوسی ایشن کے سابق سکریٹری روہن دیسائی کی جگہ جوائنٹ سکریٹری ہوں گے ۔ سوراشٹرا کے سابق کپتان جے دیو شاہ کو بی سی سی آئی کی ایپکس کونسل میں شامل کئے جانے کا امکان ہے اور وہ میزورم کے خیرالجمال مجمدار کی جگہ لیں گے ، جو ممکن ہے آئی پی ایل گورننگ کونسل میں شامل ہوں گے ۔
