نئی دہلی : ملک میں یومیہ دیسی پروازوں کی تعداد جمعرات کے روز ایک ہزار چار سو کے قریب پہنچ گئی ہے ، جبکہ مکمل تالا بندی کے بعد سے اب تک ہوائی مسافروں کی کل تعداد 91لاکھ کے پار ہو چکی ہے ۔سرکاری معلومات کے مطابق 17ستمبر کو مجموعی طورپر 1,383مسافر طیاروں نے گھریلو روٹوں سے پرواز بھرے ، جن میں 116398مسافر وں نے سفرکیا۔شہری ہوا بازی کے وزیر ہردیپ سنگھ پوری نے کہا کہ ملک میں مکمل تالا بندی کے بعد 25 مئی کو گھریلو پروازیں دوبارہ شروع ہونے سے اب تک 91 لاکھ سے زیادہ ہوئی مسافر سفر کرچکے ہیں۔ ایک ٹوئیٹ میں انہوں نے لکھا کہ “گھریلو شہری ہوا بازی آپریشن پرسکون طریقے سے چل رہے ہیں۔ 17ستمبر کو 116398 مسافروں کے سفر کرنے کے ساتھ، ہم آہستہ آہستہ کوویڈ۔19 سے پہلے کی سطح کی طرف گامزن ہیں۔
