لاہور: پاکستان کے فاسٹ بولر نسیم شاہ کو دی ہنڈریڈ کیلئے این او سی جاری نہ کرنے کا فیصلہ کیا گیا ہے۔ پاکستان کرکٹ بورڈ نے نیشنل ٹیم کے فاسٹ بولر کو ورک لوڈ مینجمنٹ کے تحت بورڈ سے نو آبجکشن سرٹفکیٹ (این او سی) جاری نہیں کیا۔ نسیم شاہ نے این او سی کیلئے درخواست دی تھی جس کے جائزے کے بعد یہ فیصلہ کیا گیا۔ نسیم شاہ گزشتہ سال فٹنس مسائل سے دو چار ہوئے تھے اور اب پاکستان ٹیم کے ورلڈ ٹسٹ چمپئن شپ کے اہم میچز ہیں۔ دی ہنڈریڈ لیگ میں فاسٹ بولر نے برمنگھم فینکس کے ساتھ معاہدہ کیا تھا۔ تینوں فارمٹ کے فاسٹ بولر کو انجریز سے محفوظ رکھنے کیلئے این او سی جاری نہیں ہوا اور اس حوالے سے نسیم شاہ کو آگاہ کردیا گیا ہے۔ نسیم کو دی 100 لیگ کی مہنگی ترین کیٹگری میں شامل کیا گیا تھا ، وہ ایک لاکھ 25 ہزار پاؤنڈز (پاکستانی روپے میں 4 کروڑ 50 لاکھ) کی مہنگی ترین کیٹگری میں شامل تھے۔
