نئی دہلی۔ صنعتکار مکیش امبانی کی کمپنی ریلائنس انڈسٹریز لمیٹڈ نے ملک کے مختلف حصوں میں تیزي سے آکسیجن پہنچانے کے لئے 24 ٹینکروں کو بیرون ملک سے ہوائی جہاز کے ذریعہ درآمد کیاہے۔ریلائنس نے آکسیجن کی سپلائی کو مضبوط بنانے کے لئے سعودی عرب، جرمنی، بیلجیم، نیدرلینڈ اور تھائی لینڈ سے 24 آکسیجن ٹینکروں کی درآمد کی۔ اس سے ملک میں مائع آکسیجن کی مجموعی نقل و حمل کی صلاحیت میں 500 ٹن کا اضافہ ہوا ہے ۔ ٹینکروں کو ایئر لفٹ کرنے میں ہندوستانی فضائیہ سے کافی مدد ملی ہے ۔ ریلائنس کے شراکت دار سعودی ارامکو اور بی پی نے آکسیجن ٹینکروں کے حصول میں مدد کی ہے ۔ ریلائنس نے اس کے لئے ہندوستانی فضائیہ اور اس کے ماتحت اداروں کا شکریہ ادا کیا ہے ۔ریلائنس کی جام نگر آئل ریفائنری میں روزانہ 1000 ٹن سے زیادہ میڈیکل گریڈ کی آکسیجن تیار ہورہی ہے ۔ یہ آکسیجن کووڈ 19 سے متاثرہ ریاستوں کو بلا معاوضہ دی جارہی ہے ۔ ریلائنس آج ملک کی قریب 11% میڈیکل گریڈ آکسیجن کا پروڈکشن اکیلے کررہا ہے اور ہر دس میں سے ایک مریض کو آکسیجن دی جارہی ہے۔
