حلقہ کاماریڈی میں انتخابی جلسہ سے کے ٹی آر کا خطاب
کاماریڈی :25؍ نومبر (سیاست ڈسٹرکٹ نیوز) بی آرایس پارٹی کے ورکنگ صدر کے ٹی راما رائو نے آج کاماریڈی حلقہ کے بھکنور میں اپنے والد چیف منسٹرچندر شیکھررائو کی انتخابی مہم میں حصہ لیا اور روڈ شو سے مخاطب کرتے ہوئے کہا کہ ریونت ریڈی کھوٹہ سکہ ہیں جو سکہ کوڑنگل نہیں چل سکا وہ کاماریڈی میں کیا چلے گا ۔ کاماریڈی حلقہ سے پردیش کانگریس کے صدر کانگریس کے امیدوار ریونت ریڈی کو تیسرا مقام حاصل ہوگا۔ انہوں نے کہا کہ لاکھوں روپئے خرچ کرتے ہوئے بی آرایس کے قائدین کو خریدا جارہا ہے اس سے کوئی فائدہ حاصل ہونے والا نہیں ہے اور نہ ہی کانگریس پارٹی آئندہ انتخابات میں ریاست میں اقتدار پر آنے والی ہے ۔ کے ٹی راما رائو نے کہا کہ کانگریس میں چیف منسٹر کے امیدوار کا ابھی تک اعلان نہیں ہوا اور چیف منسٹر کے امیدوار کو لیکر پارٹی قائدین میں شدید اختلافات پائے جارہے ہیں اور دس سے زائد قائدین اب تک چیف منسٹر کی دعویداری کا اعلان کیا ہے بی جے پی کے اعلیٰ قائدین کاماریڈی کے دور ہ میں مصروف ہے نریندر مودی اور راہول گاندھی دورہ کررہے ہیں ۔ اس موقع پر رکن اسمبلی کاماریڈی گمپا گوردھن ، رکن پارلیمنٹ بی بی پاٹل کے علاوہ دیگر بھی موجود تھے۔
