نیویارک،یکم؍ ستمبر (یو این آئی) دنیا کی نمبر ایک کھلاڑی آرینا سبالینکا، سربیا کے ٹینس اسٹار نوواک جوکووچ اور اسپینی تجربہ کار کارلوس الکاراز نے اپنے اپنے میچ جیت کر یو ایس اوپن کے کوارٹر فائنل راؤنڈ میں جگہ بنا لی ہے۔ لوئس آرمسٹرانگ اسٹیڈیم میں راؤنڈ آف 16 کے سنگلز میچ میں سبالینکا نے اسپین کی کرسٹینا بوکسا کو 6-1، 6-4 سے ہرا کر کوارٹر فائنل میں رسائی حاصل کی۔ دفاعی چمپئن سبالینکا کا مقابلہ اگلے راؤنڈ میں قازقستان کی ایلینا ریباکینا اور جمہوریہ چیک کی مارکیٹا ونڈروسووا کے درمیان میچ کی فاتح سے ہوگا۔ جوکووچ نے اتوار کی شب آرتھر ایش اسٹیڈیم میں جرمنی کے جان لینارڈ اسٹرف کو شکست دے کر نیا ریکارڈ قائم کیا۔ وہ ایک ہی سیزن میں چاروں گرینڈ سلام کے کوارٹر فائنل تک پہنچنے والے دنیا کے سب سے معمر کھلاڑی بن گئے۔ وہیں الکاراز نے 13گرینڈ سلام کوارٹر فائنل میں پہنچنے والے سب سے کم عمر کھلاڑی بننے کا اعزاز حاصل کیا۔ 38 سالہ سربین اسٹار نے ایک گھنٹہ 49 منٹ کی مسابقت میں شاندار کارکردگی کا مظاہرہ کرتے ہوئے جرمن کوالیفائر جان لینارڈ اسٹروف کو 6-3، 6-3، 6-2سے شکست دے کر اپنے کرئیر کے 14 ویں یو ایس اوپن کوارٹر فائنل میں انٹری حاصل کی۔ جوکووچ کا اگلا مقابلہ امریکی نمبر 4سیڈ ٹیلر فرٹز سے ہوگا جنہوں نے اس سے قبل جمہوریہ چیک کے ٹامس ماچک کو سیدھے سٹوں میں شکست دی۔ اس جیت کے ساتھ جوکووچ نے روجر فیڈرر اور آندرے اگاسی کو بھی پیچھے چھوڑ دیا۔ یہ دونوں 13،13 بار یو ایس اوپن کوارٹر فائنل مرحلہ میں پہنچے اور اب وہ 14،14 کے ساتھ اکیلے کھڑے ہیں۔ اب وہ اوپن ایرا ریکارڈ بک میں صرف جان کانرز سے پیچھے ہیں، جو 17 کوارٹر فائنلز میں پہنچ چکے ہیں۔ ایک دیگر میچ میں اسپین کے الکاراز نے ایک بار پھر فرانس کے آرتھر رنڈرکنچ کو سیدھے سٹوں میں شکست دے کر 2025 یو ایس اوپن کوارٹر فائنل میں جگہ بنالی۔ سکنڈ سیڈ الکاراز ، رینڈرکنیک کو 7-6(3)، 6-3، 6-4 سے ہرا کر اوپن ایرا میں 13 گرینڈ سلام کوارٹر فائنل تک پہنچنے والے سب سے کم عمر کھلاڑی بن گئے ۔ الکاراز نے 2022 میں نیویارک میں 19 سال کی عمر میں یو ایس اوپن جیت کر سب سے کم عمر عالمی نمبر ایک بننے کی تاریخ رقم کی تھی۔ وہ آخری آٹھ کے مرحلہ میں جمہوریہ چیک کے 20 ویں سیڈ جیری لہیکا کا مقابلہ کریں گے ۔ لہیکا نے فرانس کے ایڈرین مینارینو کو 7-6(4)، 6-4، 2-6، 6-2 سے ہرا کر پیشرفت کی ہے۔
