لندن: سری لنکا کے شیہان کروناتیلاکا نے اپنے ناول ’دی سیون مونز آف مالی المیڈا‘ کیلئے اس سال کا بوکر پرائز جیتا ہے اور مصنف کی کامیابی نے شدید اقتصادی سست روی سے لڑرہے ملک میں ایک مثبت اور حوصلہ افزا ماحول پیدا کیا ہے ۔ کروناتیلاکا کو انگریزی زبان کے ادبی ایوارڈ کے ساتھ ساتھ 50,000 پونڈ کا انعام بھی ملا ہے جس میں کوئین کنسورٹ کیملا کی طرف سے ٹرافی بھی شامل ہے ۔ یہ ناول 1990 کی دہائی میں سری لنکا میں جاری خانہ جنگی میں ہم جنس پرستوں کے وار فوٹوگرافر اور جواری مالی المیڈا کے بارے میں ہے ۔یہ ناول ایک مردہ فوٹوگرافر کے بارے میں ہے جو ایک ہفتے کیلئے زندہ اٹھتا ہے ۔ وہ اپنے دوستوں سے کہتا ہیکہ وہ اس کی تصاویر تلاش کریں اور جنگ کی بربریت کو بے نقاب کریں۔ ملکہ کنسورٹ کیملا نے پیر کو یہ ایوارڈ پیش کیا۔ اس موقع پر بات کرتے ہوئے مصنف نے کہاکہ ’’ایوارڈ کیلئے شارٹ لسٹ ہونا ایک اعزاز کی بات ہے‘‘ ۔اپنے ایوارڈ کو قبول کرتے ہوئے کروناتیلاکا نے کہاکہ ’’سری لنکا نے سمجھ لیا ہے کہ بدعنوانی اور نسل پرستی ان کے کسی کام کے نہیں ہیں اور نہ کبھی کام کریں گے‘‘۔
