ریاض ۔ /14 جون (سیاست ڈاٹ کام) ہر سال لاکھوں کی تعداد میں فرزندان توحید فریضہ حج کی ادائیگی کیلئے سعودی عرب جاتے ہیں۔ سعودی انتظامیہ نے مارچ میں ہی سبھی ممالک سے اپیل کرتے ہوئے کہا تھا کہ وہ کورونا وائرس کی وجہ سے حج کوٹہ کو کم رکھیں۔عالمی وبا کورونا وائرس کے بڑھتے قہر کے پیش نظر سعودی عرب انتظامیہ اس سال سفر حج کی منسوخی پر غورکرسکتا ہے ۔سعودی افسران کے مطابق سفر حج 2020 کو لے کر ایک ہفتہ کے اندر فیصلہ کیا جاسکتا ہے۔ ہر سال لاکھوں کی تعداد میں فرزندان توحید فریضہ حج کی ادائیگی کیلئے سعودی عرب جاتے ہیں۔ میڈیا کے مطابق سعودی عرب انتظامیہ اس سال سن رسیدہ عازمین پر پابندی اور طبی جانچ سمیت کئی طرح کی دیگر پابندیوں پر بھی غور کررہا ہے۔ اس کے تحت ہر ملک کو حج کا جتنا کوٹہ دیا گیا ہے، اس کے 20 فیصد ہی لوگ اس مرتبہ سفر حج پر جاسکیں گے۔سعودی عرب کی معیشت میں حج اور عمرہ سے ہونے والی آمدنی کافی اہم رول ادا کرتی ہے۔ مانا جارہا ہے کہ اس سال حج ملتوی کرنے سے سعودی عرب کی معیشت کو بھاری نقصان پہنچ سکتا ہے۔قابل ذکر ہے کہ سعودی عرب میں بھی کورونا وائرس کے معاملات تیزی سے بڑھ رہے ہیں۔ اتوار تک یہاں متاثرین کی تعداد 123,308 ہوگئی جبکہ 932 لوگوں کی موت ہوئی ہے۔ سعودی عرب میں کورونا کا پہلا معاملہ /2 مارچ کو سامنے آیا تھا۔جس کے بعد اپریل اور مئی میں اس کی رفتار کافی تیز ہوئی ہے۔
