کراچی، 5 نومبر (یو این آئی) ڈینگی بخار کی صورتحال دن بدن بگڑتی جا رہی ہے کیونکہ محکمہ صحت نے منگل کو مزید 4 مریضوں کی موت کی تصدیق کردی۔ ڈان نیوز میں شائع رپورٹ کے مطابق محکمہ صحت کے جاری کردہ تازہ اعداد و شمار میں بتایا گیا ہے کہ اب تک صوبے میں ڈینگی بخار سے 20 افراد جاں بحق ہو چکے ہیں، جن میں سے 4 اموات گزشتہ 24 گھنٹوں میں رپورٹ ہوئیں، جبکہ ایک ہی دن میں 1200 سے زائد نئے کیسز سامنے آئے ہیں۔ محکمہ صحت کی جانب سے اگرچہ 20 اموات کی تصدیق کی گئی ہے ، تاہم غیر سرکاری ذرائع کے مطابق کراچی اور حیدرآباد میں اموات کی اصل تعداد اس سے کہیں زیادہ ہے ۔ سرکاری اعداد و شمار کے مطابق اکتوبر میں سندھ میں 13 اموات رپورٹ ہوئیں، جن میں حیدرآباد میں 4، ٹنڈو محمد خان میں ایک، کورنگی میں ایک، ملیر میں 3، کراچی شرقی میں 2 اور کراچی غربی میں 2 افراد لقمہ اجل بنے ۔
