نئی دہلی: صدر کانگریس سونیا گاندھی نے پارلیمنٹ ہاوس میں واقع پارٹی کے پارلیمانی پارٹی کے دفتر میں آج لوک سبھا اراکین کے ساتھ ریاست وار میٹنگ کی اور کہاکہ پارلیمنٹ کے اجلاس میں جو قومی سطح کے امور اٹھائے گئے ہیں انہیں اپنے علاقہ کے عوام تک پہنچانے کا کام کریں۔ سونیا نے پارلیمنٹ کے سرمائی اجلاس کے اختتام کے بعد پارلیمانی پارٹی کے دفتر میں ریاست وار لوک سبھا اراکین پارلیمان کی میٹنگ طلب کی اور اراکین سے کہاکہ اس اجلاس کے دوران جن امور کو پارٹی نے اٹھایا ہے ان سب کی آواز پارلیمنٹ کے باہر جانی چاہئے۔اس بار بھی کانگریس نے ایوان کے دونوں اجلاس میں کسانوں کے امور اٹھائے اورخاص طورپر لکھیم پور کھیری میں مرکزی وزیرمملکت برائے داخلہ اجے مشرا ٹینی کے بیٹے کی گاڑی سے کسانوں کو کچلنے کے معاملے پر انہیں برخاست کرنے کی مانگ کی۔ اس کے ساتھ ہی اراکین پارلیمان کی معطلی کو بھی غلط قرار دیتے ہوئے کانگریس نے اس پر جم کر ہنگامہ کیا۔
