نئی دہلی: سپریم کورٹ نے کیرالہ اسمبلی سے منظور شدہ بلوں کو منظور کرنے میں غیر معینہ تاخیر کے معاملے میں پیر کو گورنر آفس اور مرکزی حکومت کو نوٹس جاری کیا۔ چیف جسٹس ڈی وائی چندرچوڑ اور جسٹس جے بی پارڈی والا اور منوج مشرا کی بنچ نے کیرالہ حکومت کی طرف سے دائر رٹ پٹیشن پر مرکزی حکومت اور گورنر کے پرنسپل سکریٹری سے جواب طلب کیا۔ بنچ نے اٹارنی جنرل آر وینکٹ رمانی سے بھی کہا کہ وہ عدالت کی مدد کریں۔کیرالہ حکومت نے ایک درخواست دائر کی تھی، جس میں الزام لگایا گیا تھا کہ گورنر اسمبلی سے منظور شدہ بلوں کی منظوری میں غیر معینہ مدت تک تاخیر کر رہے ہیں۔ کیرالہ حکومت کی طرف سے پیش ہونے والے سینئر وکیل کے کے وینوگوپال نے بنچ کو بتایا کہ8 بلوں میں سے کچھ 7ماہ اور کچھ 3 سال سے زیر التوا ہیں۔سپریم کورٹ اس معاملے کی اگلی سماعت جمعہ کو کرے گی۔خیال رہے کہ پنجاب اور تمل ناڈو کے بعد کیرالہ اپوزیشن کی حکمرانی والی تیسری ریاست ہے جس نے اس معاملے پر سپریم کورٹ میں رٹ پٹیشن دائر کی ہے۔
