نئی دہلی: سپریم کورٹ نے جمعہ کو سی بی آئی اور انفورسمنٹ ڈائریکٹوریٹ کو دہلی کے سابق نائب وزیر اعلیٰ کی عبوری ضمانت کی درخواست پر، جو تقریباً چھ مہینوں سے شراب پالیسی میں بے ضابطگیوں کے الزام میں تہاڑ جیل میں عدالتی حراست میں ہیں، انہیں 28 جولائی یعنی اگلی سماعت کی تاریخ تک اپنا جواب داخل کرنے کی ہدایت دی۔ جسٹس سنجیو کھنہ، جسٹس بیلا ایم ترویدی اور جسٹس اجل بھوئیاں نے متعلقہ فریقین کے دلائل سننے کے بعد دونوں مرکزی تفتیشی ایجنسیوں کو نوٹس جاری کرتے ہوئے ان سے جواب طلب کیا۔ جسٹس کھنہ کی سربراہی والی بنچ ابتدائی طور پر اس معاملے کو 21 اگست کو مزید سماعت کیلئے ملتوی کرنا چاہتی تھی، لیکن سیسوڈیا کے سینئر وکیل ابھیشیک منو سنگھوی نے عرضی گزار کی اہلیہ کی بیماری کا حوالہ دیتے ہوئے جلد سماعت کی استدعا کی۔ اس کے بعد بنچ نے اگلی سماعت کی تاریخ 28 جولائی مقرر کی۔
عام آدمی پارٹی کے سینئر لیڈر سیسوڈیا کو سی بی آئی نے 26 فروری 2023 کو انسداد بدعنوانی ایکٹ کے تحت گرفتار کیا تھا۔ اس کے بعد انفورسمنٹ ڈائریکٹوریٹ نے طویل پوچھ گچھ کے بعد منی لانڈرنگ کے الزام میں ان کے خلاف ایف آئی آر درج کی تھی۔ سیسودیا نے دونوں معاملوں میں مختلف تاریخوں پر ٹرائل کورٹ کی طرف سے ان کی ضمانت کی درخواست مسترد ہونے کے بعد دہلی ہائی کورٹ سے رجوع کیا تھا، جہاں انہیں مایوسی ہوئی تھی۔
