دمشق، 9 نومبر (یو این آئی) شام کے عبوری صدر احمد الشرع سرکاری دورہ پر امریکہ پہنچ گئے ہیں۔شام کی سرکاری خبر رساں ایجنسی سانا کے مطابق صدر احمد الشرع باضابطہ دورہ پر امریکہ پہنچ گئے ہیں۔ دورہ کے دوران وہ امریکی صدر ڈونلڈ ٹرمپ سے ملاقات کریں گے ۔ یہ دورہ اس اعلان کے بعد ہو رہا ہے جس میں امریکہ نے صدر الشرع اور وزیرداخلہ انس خطّاب کا نام پابندیوں اور دہشت گردوں کی فہرست سے ہٹا دیا تھا۔ مبصرین کے مطابق صدر الشرع کا یہ دورہ شام اور امریکہ کے تعلقات میں تاریخی سنگ میل ثابت ہو سکتا ہے ۔ الشرع واشنگٹن جانے والے پہلے شام کے صدر ہیں اور گذشتہ چند ماہ میں امریکہ اور عالمی برادری کے ساتھ شراکت داری کے راستے میں پیش رفت کی ہے ۔امریکی انتظامیہ نے ابھی تک دمشق کے ساتھ دوطرفہ تعلقات کی تفصیلی حکمت عملی پیش نہیں کی، لیکن وہ چند اہم نکات کی پابندی چاہتی ہے جن میں داعش کے خلاف تعاون، شمال مشرقی شام میں قیدیوں کے کیمپوں پر کنٹرول، غیر ملکی عناصر کی واپسی یا ملک بدری، دہشت گردوں کی حوالگی، اقلیتوں کے حقوق کا تحفظ اور اسرائیل کے ساتھ امن قائم کرنا۔شام کے لیے امریکی خصوصی نمائندے ٹام بریک نے بارہا صدر احمد الشرع اور ان کی حکومت کی کارکردگی کی تعریف کی ہے اور کہا ہے کہ وہ درست اقدامات کر رہے ہیں۔
