پونے ، 22 فروری (یو این آئی) این سی پی (شرد چندر پوار) کے صدر اور راجیہ سبھا کے رکن شرد پوار کو معمولی ڈی ہائیڈریشن کی شکایت کے بعد اتوار، 22 فروری 2026 کی صبح روبی ہال کلینک میں داخل کرایا گیا۔ اسپتال انتظامیہ کے مطابق 85 سالہ رہنما کی حالت مستحکم ہے اور وہ علاج کا مثبت ردعمل دے رہے ہیں۔اسپتال کی جانب سے جاری بیان میں بتایا گیا کہ انہیں چیک اپ کے لیے داخل کیا گیا ہے اور نس کے ذریعے سیال دیا جا رہا ہے ۔ چیف کارڈیالوجسٹ ڈاکٹر پرویز گرانٹ نے کہا کہ شرد پوار کو ہلکی ڈی ہائیڈریشن کے باعث داخل کیا گیا ہے ، ان کی حالت مستحکم ہے ، وہ 2 دن اسپتال میں زیر نگرانی رہیں گے اور اس کے بعد انہیں ڈسچارج کیے جانے کی توقع ہے ۔ گزشتہ دو ہفتوں سے کم وقت میں وہ دوسری مرتبہ اسپتال میں داخل ہوئے ہیں۔ اس سے قبل انہیں 9 فروری 2026 کو گلے کے انفیکشن، بخار اور سینے میں جکڑن کی شکایت کے باعث اسی اسپتال میں داخل کیا گیا تھا جہاں طبیعت بہتر ہونے پر انہیں چھٹی دے دی گئی تھی۔
