پیانگ یانگ ۔ شمالی کوریا کے قائد کم جونگ ان نے میزائل تجربات اور خلائی راکٹ لانچ کرنے کے مقام میں توسیع کرنے کا حکم دے دیا۔ ادھر امریکہ نے دعویٰ کیا ہے کہ اسے پیانگ یانگ کی جانب سے نئے بین البراعظمی بیلیسٹک میزائل سسٹم کے تجربے کا سراغ ملا ہے۔ شمالی کوریا کی سرکاری میڈیا کی اطلاعات کے مطابق کم جونگ ان نے اپنے عہدیداروں کو حکم دیا ہے کہ وہ مختلف قسم کے راکٹ لانچ کرنے کے لیے ملک کی سیٹلائٹ لانچ سسٹمز کو مزید وسیع کریں۔خبررساں اداروں کے مطابق یہ بات کم جونگ ان نے سوہائے سٹیلائٹ لانچنگ گراؤنڈ کے دورے کے دوران کہی۔ واضح رہے کہ اس مقام کو ماضی میں سیٹیلائٹ کو مدار میں بھیجنے اور میزائل سے متعلق مختلف طرح کی ٹیکنالوجی کا تجربہ کرنے کے لیے استعمال کیا جاتا رہا ہے۔
