مکان پر دھاوا کیا گیا ۔ افراد خاندان پر دباؤ ۔ بی آر ایس امیدوار ماگنٹی سنیتا مکان پہونچ گئیں
حیدرآباد۔6۔نومبر۔(سیاست نیوز) حلقہ اسمبلی جوبلی ہلز کی انتخابی سرگرمیوں کے دوران شیخ پیٹ ڈویژن میں چیف منسٹر اے ریونت ریڈی کے روڈ شو سے قبل بی آر ایس قائد وحید احمد ایڈوکیٹ کے مکان پر دھاوے اور ان کے افراد خاندان کو پولیس کی ہراسانی کی شکایات کے بعد بی آر ایس امیدوارہ محترمہ ماگنٹی سنیتا نے جناب وحید احمد ایڈوکیٹ کے مکان پہنچ کر ان کے افراد خاندان کو ہراسانی کے متعلق تفصیلات حاصل کی اور کہا کہ تلنگانہ میں ایک حلقہ اسمبلی کے ضمنی انتخابات کے دوران جس انداز میں سرکاری مشنری کا استعمال کیا جا رہاہے وہ ناقابل برداشت ہے۔ محترمہ ماگنٹی سنیتا نے کہا کہ حکومت کی جانب سے پولیس کے استعمال کے ذریعہ بی آر ایس قائدین و کارکنوں کو ہراساں کئے جانے کی شکایت اور وحید احمد کے مکان میں پولیس کی کارستانیوں کا ویڈیو وائرل ہونے کے بعد وہ ان سے اور ان کے افراد خاندان سے ملاقات کرنے پہنچی ہیں۔ انہو ںنے پولیس کی اس کاروائی کے خلاف شدید احتجاج کرکے کہا کہ ان حرکتوں کو مزید برداشت نہیں کیا جائے گا۔جناب وحید احمد ایڈوکیٹ کے معمر والد نے پولیس ہراسانی اور لگاتار دباؤ ڈالے جانے کی تفصیلات سے ماگنٹی سنیتا کو واقف کروایا اور کہا کہ ان کے سارے خاندان کو ہراسانی کا نشانہ بنایا جا رہا ہے ۔ 3
