ہاسپٹلس میں زخمیوں کی عیادت، حکومت سے ایکس گریشیاء کا تیقن
حیدرآباد 25 نومبر (سیاست نیوز) صدرنشین تلنگانہ بی سی کمیشن جی نرنجن نے آج شاہ علی بنڈہ کے علاقہ میں آتشزدگی کا شکار گومتی انٹرپرائزس کا معائنہ کیا اور شوروم اور اُس کے اطراف و اکناف کی دوکانات کو ہوئے بھاری نقصانات کا جائزہ لیا۔ جن نرنجن نے متاثرین اور اطراف کے دوکانداروں سے آتشزدگی کی وجوہات اور نقصانات کے بارے میں معلومات حاصل کیں۔ مقامی افراد نے بتایا کہ رات 10.28 بجے 3 دھماکوں کی آواز سنائی دی اور الیکٹرانک شوروم کے علاوہ متصل کلاتھ اسٹور مکمل طور پر خاکستر ہوگئی۔ قریب میں واقع سوئٹ شاپ کو بھی دھماکہ کے اثر سے نقصان پہونچا۔ آتشزدگی کے نتیجہ میں ایک کار اور 2 ٹو وہیلر گاڑیاں بھی خاکستر ہوگئیں۔ جی نرنجن نے گومتی الیکٹرانکس کے مالک شیوا کی صحت کے بارے میں دریافت کیا جنھیں ڈی آر ڈی او ہاسپٹل کنچن باغ میں شریک کیا گیا ہے۔ دیگر 2 ملازمین گنیش اور کارتک عثمانیہ جنرل ہاسپٹل میں زیرعلاج ہیں۔ جی نرنجن نے دونوں ہاسپٹلس پہونچ کر زخمیوں کی عیادت کی اور ڈاکٹرس کو مؤثر علاج کی ہدایت دی۔ ڈاکٹرس نے بتایا کہ شوروم کے مالک شیوا 80 فیصد سے زائد جھلس چکے ہیں اور اُنھیں بچانے کے لئے مؤثر علاج کیا جارہا ہے۔ سپرنٹنڈنٹ عثمانیہ ہاسپٹل نے بتایا کہ کارتک اور گنیش 25 فیصد جھلس گئے ہیں اور اُن کا علاج جاری ہے۔ نرنجن نے بتایا کہ دھماکہ اور آتشزدگی میں ایک نامعلوم شخص کی ہلاکت ہوئی ہے۔ اُنھوں نے حکومت کی جانب سے متاثرین کو ایکس گریشیاء کی ادائیگی کے لئے نمائندگی کا تیقن دیا۔1
