سلوواکیہ: ایک اسپورٹس کار کو صرف 3 منٹ میں 2 نشستوں والے ہوائی جہاز میں بدلنے کا عملی مظاہرہ کیا گیا ہے۔ اڑن کار کلائن ویژن کمپنی نے تیار کی ہے اور اس تجربے کے بعد پروٹوٹائپ (عملی نمونے) کی جانچ کا یہ پانچواں تجربہ بھی تھا۔اسے ’ایئرکار‘ کا نام دیا گیا ہے اور پرواز سے قبل اس کا پچھلا حصہ لمبا ہوجاتا ہے۔ اس میں ایک پروپیلر کام کرنے لگتا ہے۔ دائیں اور بائیں بازو سیدھے ہوجاتے ہیں اور اسے دو نشستی ہوائی جہاز بننے میں صرف تین منٹ لگتے ہیں۔ کلائن وڑن نامی کمپنی کے مطابق اب تک سلوواکیہ کے پائسٹینی ایئرپورٹ سے یہ دوپروازیں مکمل کرچکی ہے اور مجموعی طور پر 1500 فٹ کی بلندی تک جاچکی ہے۔ اس طرح یہ تجارتی آزمائش و تیاری کے قریب جاپہنچی ہے۔کار ساز ماہر پروفیسر اسٹیفن کلائن نے نے خود اس کار کو اُڑایا ہے اور اسے دو مرتبہ ٹیک آف اور لینڈنگ سے گزارا ہے۔
