اس بل کے ذریعہ مسابقت اور خریداری بڑھے گی ،کسانوں کو مناسب قیمت ملے گی
نئی دہلی: راجیہ سبھا نے آج ضروری اشیاء (ترمیمی) بل ،2020 کو اپوزیشن کی غیر موجودگی میں صوتی ووٹوں سے پاس کردیا جس میں اناج، دلہن،تلہن ،کھاد تیل،پیاز اور آلو کو ضروری اشیا کی فہرست سے ہٹانے کا التزام ہے ۔لوک سبھا نے اس بل کو پچھلے ہفتے پاس کیا تھا۔ اس طرح اس بل پر آج پارلیمنٹ کی مہر لگ گئی۔اس بل کے قانون بننے پر نجی سرمایہ کاروں کو ان کے کاروبار کو چلانے میں زیادہ ریگولیٹری مداخلت کا خدشہ دور ہوجائے گا۔ پیداوار ،پیداوار کی حد، آمدو رفت ،تقسیم اور فراہمی کی آزادی سے فروخت کی معیشت کو بڑھانے میں مدد ملے گی اور زرعی شعبہ میں نجی شعبہ؍غیر ملکی براہ راست سرمایہ کاری متوجہ ہوگی۔ایوان بالا میں صارفین معاملے ،خوراک اور عوامی تقسیم کے وزیر مملکت راؤ صاحب دانوے نے اس بل کو پیش کیا ۔اس کے بعد ایوان میں اس پر اپوزیشن کی غیر موجودگی میں بحث ہوئی جس میں گوپال نارائن سنگھ، کے ایس آر بالاسبرامنیم ،رام چندر سنگھ،امر پٹنائک اور کنکمیدلا رویندر کمار نے اپنے خیالات رکھے ۔بحث کا جواب دیتے ہوئے دانوے نے کہا کہ اس بل کے ذریعہ سے زرعی شعبہ میں مکمل سپلائی چین کو مضبوط بنایا جاسکے گا،کسان مضبوط ہوگا اور سرمایہ کاری کو فروغ ملے گا۔ مرکزی وزیر نے کہا کہ اس بل پر غور کرنے کیلئے وزرائے اعلیٰ کی ایک اعلیٰ حقوق کمیٹی تشکیل کی گئی تھی۔ اس بل میں ایسے التزامات کئے گئے ہیں جس سے بازار میں مقابلہ بڑھے گا، خرید بڑھے گی اور کسانوں کو ان کی پیداوار کی مناسب قیمت مل سکے گی۔وزیر کے جواب کے بعد ایوان نے کچھ اراکین کی ترامیم کو قبول نہ کرتے ہوئے صوتی ووٹوں سے بل کو منظوری دیدی۔ یہ بل متعلقہ آرڈیننس کی جگہ پر لایا گیا ہے ۔ اس آرڈیننس کو 5جون 2020 کو جاری کیاگیا تھا۔
