قیمتوں میں اضافے پر بی جے پی کی خاموشی حیران کن: کمار سوامی
بنگلورو: کرناٹک کے سابق وزیر اعلیٰ اور جنتا دل (ایس) لیڈر ایچ ڈی کمار سوامی نے کہاکہ حجاب اور حلال میٹ کے مسئلہ کو غیر ضروری اُچھالا جارہا ہے جس سے فرقہ وارانہ کشیدگی پیدا ہوگی اور ریاست کی صنعتیں متاثر ہوں گی۔ اُنھوں نے کہاکہ عوام کو حلال یا جھٹکے کے میٹ میں کوئی دلچسپی نہیں ہے۔ دوسری طرف اُنھوں نے پٹرول اور ڈیزل کی قیمتوں پر خاموش رہنے پر بھارتیہ جنتا پارٹی، ریاستی حکومت اور وزیر اعلیٰ بسواراج بومئی کے خلاف شدید ناراضگی کا اظہار کیا ہے۔ سابق وزیر اعلیٰ نے آج کئی ٹوئٹس میں کہا کہ ’’بی جے پی نے خاموشی سے ہتھیار ڈال دیئے ہیں۔ انہوں نے کہا کہ جب 2018 میں وہ چیف منسٹر تھے تو بی جے پی لیڈر پٹرول کی قیمت میں 1.12 پیسے فی لیٹر اور ڈیزل کی قیمت میں 1.14 پیسے فی لیٹر اضافے پر ناراض تھے۔ ان کا پیٹ جل گیا کیونکہ قیمتوں میں اضافے کا یہ پیسہ کسانوں کے پاس نہیں جا رہا تھا۔ انہوں نے کہا کہ سڑک پر خالی سلنڈر لے جانے والی بی جے پی نے ہتھیار کیوں ڈالے؟ مہنگائی کی وجہ سے غریب کا پیٹ جل جائے تو کیا آپ خوش ہیں؟ ۔انہوں نے کہا کہ سیمنٹ، لوہا اور کھانے پینے کی اشیاء سمیت عام آدمی کے استعمال کی ہر چیز کی قیمتوں میں مسلسل اضافہ ہو رہا ہے۔ گھر بنانے کا خواب صرف ایک خواب ہے۔
