پیرس : فرانسیسی صدر ایمانول میکرون نے یہ امکان ظاہر کیا ہیکہ فرانس آنے والے مہینوں میں فلسطینی ریاست کو تسلیم کر سکتا ہے۔فرانس 5 ٹیلی ویژن کو دیے گئے انٹرویو میں میکرون بتایا کہ ’میں اس فیصلے کو جون میں اسرائیل-فلسطین تنازعہ پر اقوام متحدہ کی ایک کانفرنس میں حتمی شکل دینا چاہتا ہوںجس کی میزبانی فرانس اور سعودی عرب مشترکہ طور پر کریں گے‘۔انہوں نے کہا کہ’ہمیں تسلیم کرنے کی جانب بڑھنا ہوگا اور ہم آئندہ مہینوں میں ایسا کریں گے، میں یہ کسی کو خوش کرنے کے لیے نہیں کر رہا بلکہ میں یہ اس وقت کروں گا جب مجھے لگے گا کہ یہ صحیح ہے‘۔دوسری جانب فلسطین کی وزیر مملکت برائے امور خارجہ وارسین اغابیکیان شاہین نے خبر رساں ادارے اے ایف پی کو بتایا کہ’ فرانس کی طرف سے تسلیم کرنا فلسطینی عوام کے حقوق اور دو ریاستی حل کے تحفظ کے مطابق ایک درست قدم ہوگا ‘۔ادھراسرائیلی وزیر خارجہ جدعون سار نے ایکس پر ٹوئٹ میں لکھاکہ ایسی کسی خیالی فلسطینی ریاست کو کسی بھی ملک کی جانب سے ‘یکطرفہ تسلیم کرنا’ موجودہ زمینی حقائق کے تناظر میں دہشتگردی کے لیے انعام اور حماس کے لیے حوصلہ افزائی ہوگا۔
