تلنگانہ عوام کے حقوق کا تحفظ ہمارا مقصد حیات ‘ صدر جاگروتی کا خطاب
نظام آباد :27؍ ستمبر ( سیاست ڈسٹرکٹ نیوز) قطر میں تلنگانہ کی ثقافت کو اجاگر کرنے والی بتکماں تقاریب نہایت شاندار پیمانے پر منعقد ہوئیں۔ ان تقاریب کا اہتمام تلنگانہ جاگروتی قطر شاخ کی جانب سے کیا گیا، جن میں مہمان خصوصی کی حیثیت سے صدر تلنگانہ جاگروتی کے کویتا نے شرکت کی۔قطر پہنچنے پر ان کا زبردست خیر مقدم کیا گیا ایئرپورٹ پر بڑی تعداد میں پہنچ کر ان کا استقبال کرتے ہوئے ان کی تہنیت کی گئی قطر میں مقیم تلنگانہ کے عوام بڑی تعداد میں شریک ہو کر اپنے تہذیبی ورثہ کا مظاہرہ کیا۔ کویتا نے قطر میں تلنگانہ خواتین کے ساتھ بھرپور جوش و خروش کے ساتھ بتکماں کھیلا۔ اور انہیں مبارکباد پیش کی اس موقع پر کے کویتا نے خطاب کرتے ہوئے کہا کہ تلنگانہ کے عوام کہتی ہیں کہ روزگار کی تلاش میں ہمیں اپنے گھروں کو چھوڑ کر دبئی، قطر آنا پڑا۔ یہاں آنے والوں کی مشکلات ہمیں معلوم ہیں۔ والدین اور اہل خانہ سے دور رہتے ہوئے زندگی گزارنا اور پھر اپنی تنخواہ میں سے کچھ حصہ بچا کر گھر بھیجنا آسان نہیں۔ آپ کے دلوں میں جو غم ہے ہم اسے سمجھتے ہیں، ہماری کوشش ہے کہ وہ غم دور ہو۔ جلد ہی وہ دن آئے جب آپ سب تلنگانہ واپس لوٹ سکیں یا یہیں رہ کر بھی بہتر زندگی گزار سکیں۔جب بھی کوئی تہوار آتا ہے تو آپ اپنے خاندان کو یاد کرتے ہیں۔ میرے دل کو بھی تکلیف اور دکھ ہے، لیکن زندگی میں کچھ مواقع ایسے آتے ہیں جب جدوجہد کرنی پڑتی ہے۔ چاہے اپنا ہو یا غیر، دیکھنا یہ ہے کہ انصاف اور دھرم کس طرف ہے۔ آپ دل پر کوئی بوجھ نہ رکھیں۔ ہمارا حال چاہے کچھ بھی ہو، ہمارا مقصد صرف تلنگانہ کے عوام کی بھلائی، ان کے حقوق کا تحفظ اور تلنگانہ کے عوام کے لئے مسلسل جدوجہد ہے۔