نئی دہلی، 26 ستمبر (یو این آئی) کانگریس پارٹی نے کہا ہے کہ بھارتیہ جنتا پارٹی (بی جے پی) کے کچھ لیڈر، نیوز چینل کے اینکر اور سوشل میڈیا کے کئی لوگ تشدد میں ملوث کسی شخص کی تصویر غلط طریقہ سے پیش کے اسے کانگریسی کونسلر بتاکر پارٹی کو بدنام کرنے کی کوشش کررہے ہیں۔ پارٹی نے اسے سوچی سمجھی سازش کا حصہ قرار دیتے ہوئے کہا کہ یہ سیاسی فائدہ حاصل کرنے کے لیے کانگریس کے خلاف چلائے جارہے پروپگنڈے کا حصہ ہے اور اس میں ملوث افراد کے خلاف قانونی کارروائی کی جائے گی۔ کانگریس کے شعبہ مواصلات کے سربراہ جے رام رمیش نے کہا کہ بی جے پی کے کئی لیڈر اور کچھ اینکرز اور سوشل میڈیا پر اثر انداز کرنے والے ایک شخص کی تصاویر اور فوٹیج دکھا رہے ہیں اور اسے کانگریس کے منتخب کونسلر فنٹسوگ اسٹین زن تسپاگ بتاکر اسے غلط طور پر پیش کر رہے ہیں۔ انہوں نے کہا کہ ہم ان تمام لوگوں کے خلاف قانونی اور فوجداری کارروائی کر رہے ہیں۔
