محبوب نگر ۔30 اکٹوبر (سیاست ڈسٹرکٹ نیوز) رکن قانون ساز کونسل و صدر تلنگانہ جاگرتی کلوا کنٹلہ کویتا نے جاگروتی جنم باٹا پروگرام کے ضمن میں محبوب نگر کا دورہ کیا۔ اس موقع پر انہوں نے قطب محبوب نگر حضرت مردان علی شاہ قادریؒ ،شاہ صاحب گٹہ پر حاضری دی۔سجادہ نشین حضرت سید عبدالرزاق شاہ قادری سے ملاقات کی اور بارگاہ میں پھولوں کی چادر پیش کی۔ اس موقع پر سید عبدالرزاق شاہ قادری، سید ظفر شاہ قادری، سید واصف شاہ قادری، محمد عبدالرحیم فاؤنڈر نواب میر محبوب علی خان فاؤنڈیشن، محمد محسن خان میر شعیب علی و دیگر معززین موجود تھے۔ دریں اثناء انہوں نے نظام الدین مرحوم جوکہ گزشتہ دنوں امریکہ میں پولیس فائرنگ میں شہید ہوگئے تھے، کے مکان واقع بی کے ریڈی کالونی پہنچ کر ان کے والد محمد حسن الدین اور ان کے افراد خاندان سے ملاقات کی اور پرسہ دیا۔ ان کے ہمراہ مقامی قائدین و کارکنان موجود تھے۔
