میزروم میں معلق اسمبلی کا امکان نہیں ،تلنگانہ میں بھی کانگریس کے امکانات روشن
نئی دہلی : پانچ ریاستوں میں اسمبلی الیکشن کی تکمیل کے ساتھ ہی ایگزٹ پول کے نتائج آنے شروع ہوگئے ہیں ۔اگرچہ مختلف ایگزٹ پولس میں نتائج مختلف ہیں لیکن تازہ ایگزٹ پول کے مطابق مدھیہ پردیش ‘ چھتیں گڑہ اور راجستھا ن میں کانگریس اقتدار کی پیش قیاسی کی جارہی ہے ۔چھتیس گڑھ ایک ایسی ریاست ہے جہاں سے کانگریس کو انتخابات کے اس دور میں سب سے زیادہ امیدیں ہیں۔تلنگانہ کی 119 سیٹوں پر آج ووٹنگ کے بعد پانچ ریاستوں کیلئے ووٹنگ ختم ہو گئی۔ ایگزٹ پولز کے نتائج سے پارٹیوں کو ابتدائی اندازہ ہو جائے گا کہ انتخابی نتائج کیسے ہو سکتے ہیں۔راجستھان میں 200 میں سے 199 سیٹوں پر ووٹنگ ہوئی۔ چیف منسٹر شیوراج سنگھ چوہان نے یقین ظاہر کیا ہے کہ وہ مدھیہ پردیش میں پانچویں بار حکومت بنائیں گے۔ دریں اثنا، میزورم میں، وزیر اعلی، زورمتھنگا نے اعتماد کا اظہار کیا ہے کہ میزورم میں معلق اسمبلی نہیں ہوگی اور ان کی میزو نیشنل فرنٹ (MNF) دوبارہ حکومت بنائے گی۔ تلنگانہ میں برسراقتدار بی آر ایس ‘ بی جے پی اور کانگریس کے درمیان سخت مقابلہ ہے۔ایگزٹ پول ایک ایسا سروے ہوتاہے جو لوگوں کے اپنے متعلقہ امیدواروں کو ووٹ دینے کے فوراً بعد کیا جاتا ہے۔یہ مکمل طور پر درست بھی نہیں ہوسکتا۔پانچ اسمبلی انتخابات کے نتائج کا اعلان اتوار 3 دسمبر کو کیا جائے گا۔ 3 دسمبر کو ہونے والے ان انتخابات کے نتائج کا اثر لوک سبھا کے اہم انتخابات پر پڑے گا جو اگلے سال اپریل۔مئی میں ہونے کی امید ہے۔ ان انتخابات سے جو بھی پارٹی سب سے زیادہ فائدہ اٹھائے گی وہ مثبت رفتار کے ساتھ قومی انتخابات میں حصہ لے گی۔ چونکہ 5 ریاستوں کے منجملہ کم از کم 3 میں کانگریس کا بی جے پی سے سخت مقابلہ ہے اس لیے دونوں قومی جماعتوں کیلئے نتائج انتہائی اہمیت کے حامل ہوں گے۔ ایک اور سروے کے مطابق کانگریس پارٹی راجستھان میں اقتدار برقرار رکھ سکتی ہے ۔انڈیا ٹوڈے ایکسس مائی انڈیا کے مطابق کانگریس کو 40 تا50 سیٹیں ملنے کی امید ہے، بی جے پی کو 36تا46 سیٹیں ملنے کی امید ہے، جبکہ دیگر کو 1 سے 5 سیٹیں ملنے کی امید ہے۔ چھتیس گڑھ میں اسمبلی سیٹوں کی کل تعداد 90 ہے اور اکثریت کی تعداد 46 ہے۔ٹوڈیز چانکیہ ایگزٹ پول کے مطابق چھتیس گڑھ کے عوام نے بی جے پی کو 40 فیصد ووٹ دیے ہیں، 45 فیصد ووٹ کانگریس کے کھاتے میں جاتے نظر آرہے ہیں۔ دیگر کے 15 فیصد ووٹ ہوں گے۔نیوز 18 جن کے ایگزٹ پول کے مطابق چھتیس گڑھ میں بی جے پی کو 40، کانگریس کو 47 اور دیگر کو2 سیٹیں ملنے کی امید ہے۔سی ووٹر کے ایگزٹ پول کے مطابق چھتیس گڑھ میں کانگریس کو 41 تا53 سیٹیں، بی جے پی کو 36تا38 سیٹیں اور دیگر کو 0تا4 سیٹیں ملنے کا امکان ہے۔ٹائمز ناؤ اور ای ٹی جی کے سروے میں کانگریس کو 48تا56 سیٹیں ملنے کی امید ہے۔ اس سروے کے مطابق بی جے پی کو 32تا40 سیٹیں مل سکتی ہیں جبکہ دیگر کو 2تا4 سیٹیں مل سکتی ہیں۔سی این ایکس ایگزٹ پول میں، چھتیس گڑھ میں بی جے پی کو 30تا40 سیٹیں، کانگریس کو 46تا56 سیٹیں اور دیگر کو 3تا5 سیٹیں ملنے کی امید ہے۔تلنگانہ میں بھی کانگریس اقتدار کے امکانات روشن نظر آرہے ہیں ۔