مکہ مکرمہ۔سعودی عرب میں مسجد الحرام کے انتظامیہ نے معذور زائرین کے لیے داخلہ اور باہر جانے کے راستے اور نمازکے مقامات مختص کئے ہیں۔ یہ اہتمام حرم مکی میں نماز اور عمرے کی بحالی پروگرام کے تحت کیا گیا ہے۔ تفصیلات کے مطابق حرم انتظامیہ نے پہلی منزل معذوروں کی نماز کے لیے مختص کردی ہے۔ معذوروں کو حرم مکی کے صحن پہنچنے پر خوش آمدیدکہا جارہا ہے اور وہاں سے نکلنے تک ان کا خیال رکھا جارہا ہے۔ سماجی فاصلے کی علامتیں بھی چسپاں کردی گئی ہیں۔ حرم انتظامیہ نے معذوروں سے ربط و ضبط پیدا کرنے اور ان کی نفسیات کو سامنے رکھ کر انہیں سمجھانے اورسمجھنے کا بھی خصوصی انتظام کیا ہے۔ اس مقصد کے لئے مخصوص عملہ تعینات کیا گیا ہے۔ معذوروں کو ماسک، سینیٹائزر اور آب زمزم کی بوتلیں بھی پیش کی جارہی ہیں۔ حرم انتظامیہ میں معذوروں کے حوالے سے ایک شعبہ قائم کیا گیا ہے۔ اس شعبے کے عہدیدار سیکیورٹی عملہ کے ساتھ مل کر معذروں کا درجہ حرارت چیک کررہے ہیں۔ حرم انتظامیہ اس مقصد کے لیے کمپیوٹرائزڈ تھرمل کیمرے نصب کیے ہوئے ہے۔ معذروں کے امور کے ڈائریکٹر جنرل فیصل بن الجودی نے کہا کہ کورونا وبا کے خاص حالات کو سامنے رکھ کر بڑی احتیاط سے انتظامات کیے گئے ہیں۔ معذوروں کے لیے گولف گاڑیاں، الیکٹرانک وہیل چیئرزکا بھی بندوبست کیا گیا ہے۔ معذور حضرات کو وہیل چیئرز مفت فراہم کی جارہی ہیں جن سے وہ طواف، سعی اور حرم شریف آنے جانے میں سہولت محسوس کررہے ہیں۔ الجودی نے مزید کہا ہے کہ حرم شریف میں 32 دروازے ایسے ہیں جن سے معذوروں کی وہیل چیئرز بآسانی اندر آسکتی اور جاسکتی ہیں۔ علاوہ ازیں گیٹ نمبر 94، 93، 90، 89، 84، 79، 74 اور 68 نمبر کے دروازے صرف معذوروں کے لیے مختص ہیں جبکہ اجیاد پل، الشبیکہ پل، المروہ پل اور الارقم پل پر معذوروں کو سہولتیں فراہم کی جارہی ہیں۔ الیکٹرانک زینوں اورلفٹ میں خاص علامتیں چسپاں کی گئی ہیں۔
