میدک میں مختلف عنوانات کے تحت مقابلوں کا اہتمام ، ذمہ داران جماعت کا خطاب
مید ک ۔ 29 اکٹوبر (سیاست ڈسٹرکٹ نیوز) محسن انسانیت حضرت محمد صلی اللہ علیہ وسلم کی حیات مبارک و سیرت کو ملت کے فرزندوں اور دختران میں ابھی سے اجاگر کرنے اور بہتر عملی شکل دینے اور اللہ اور رسول اللہؐ سے عشق اور تعلق کو تقویت دینے کی غرض سے جماعت اسلامی ہند، SIO اور GIO کے زیراہتمام 10 واں سالانہ 2025-26ء کا انعقاد عمل میں لایا جارہا ہے۔ یہ بات کنوینر پروگرام محمد شاکر علی مدرس نے دفتر جماعت اسلامی ہند میدک واقع مسجد عروب میں منعقدہ ایک پریس کانفرنس میں بتائی۔ انہوں نے بتایا کہ تمام پروگرامس صدر ایس آئی او میدک فاصل حسین کی صدارت و نگرانی میں منعقد کئے جائیں گے۔ شاگر نے بتایا کہ مقابلوں میں حصہ لینے والے تمام طلباء و طالبات کسی بھی زبان کو اختیار کرکے حصہ لے سکتے ہیں۔ داخلہ فارمس 2 نومبر سے جاری کئے جائیں گے۔ مغرب تا عشاء دفتر جماعت اسلامی ہند سے حاصل کئے جاسکتے ہیں۔ حصہ لینے والوں کو اورینٹیشن کلاسیس کا بھی اہتمام رہے گا۔ محمد شاکر نے مقابلوں کی تفصیلات سے واقف کراتے ہوئے کہا کہ جاریہ سال بچوں میں اسپورٹس میں دلچسپی کیلئے کرکٹ مقابلے بھی ہوں گے۔ انہوں نے کہا کہ کوئز مقابلہ کلاس اول سے چھٹویں (جونیرس) کیلئے 13 ڈسمبر کوں ہوں گے اور سینئر ساتویں تا انٹرمیڈیٹ طلبہ کیلئے 14 ڈسمبر کو مقابلے ہوں گے اور 21 ڈسمبر کو تقریری مقابلے جونیرس اور سینئرس کیلئے منعقد ہوں گے۔ اسی طرح گرلز کیلئے بھی مقابلے ہوں گے۔ 25 اور 26 ڈسمبر کو تحریری امتحان جونیرس و سینئرس کیلئے منعقد کئے جائیں گے۔انہوں نے کہا کہ 4 جنوری 2026 کو تمام زمروں کیلئے اصلاحی نمائش کا اہتمام ہوگا اور اختتامی و انعامی تقریب 18 جنوری کو منعقد ہوگی۔ اس موقع پر متاثرکن مظاہرہ کرنے والوں کو اعزازات سے نوازا جائے گا۔ انہوں نے کہا کہ تمام مقابلوں کیلئے ہال ٹکٹس لازم ہوں گے۔ انہوں نے کہا کہ نوجوان نسل میں اسلامی اقدار، اخلاقی نظم و ضبط پیدا کرنا جماعت اسلامی کا مقصد ہے۔ اس پریس کانفرنس میں صدر ایس آئی او فاضل حسین کے علاوہ دیگر برادران جماعت اسلامی سید سعادت علی ذکی، محمد تقی الدین، امیر الدین، مجیب الدین، احتشام الدین اور حافظ محمد لطیف حسین بھی موجود تھے۔
