حیدرآباد ۔ 21۔نومبر (سیاست نیوز) حکومت ہند نے موجودہ لیبر قوانین کو مزید آسان بنانے اور مؤثر عمل آوری کے ذریعہ ورکرس کے حقوق کے تحفظ کے سلسلہ میں چار علحدہ کوڈ جاری کئے ہیں۔ تنخواہوں کی ادائیگی ، صنعتوں سے ورکرس کے تعلقات ، سوشیل سیکوریٹی اور سیفٹی و ہیلت کنڈیشن جیسے امور پر موجودہ قوانین میں موجود گنجائشوں کی وضاحت کی گئی ہے ۔ آتما نربھر بھارت اسکیم کے تحت حکومت ہند نے ملک بھر میں لیبر اور ورکر طبقہ کی بھلائی کے اقدامات کئے ہیں۔ نئے جاری کردہ لیبر کورٹ کے ذریعہ قوانین میں اصلاحات کی گنجائش رہے گی۔ لیبر کو اقل ترین تنخواہ کی ادائیگی کے علاوہ 40 سال سے زائد عمر کے لیبر کے لئے سالانہ مفت ہیلت چیک اپ کو لازمی قرار دیا گیا ہے ۔ صنعتوں سے لیبر طبقہ کے تعلقات کو استوار کرنے اور صنعتوں میں تحفظ کیلئے بنیادی ضرورتوں کی فراہمی کو یقینی بنایا جائے گا۔ چھوٹی اور متوسط صنعتوں کے علاوہ بیڑی ورکرس اور دیگر شعبہ جات کے ور کرس کے لئے بھی مختلف مراعات کا اعلان کیا گیا ہے ۔1
