خواتین کی ترقی کے لیے حکومت کے کئی اقدامات، یوم پیدائش پر سابق وزیر اعظم کو خراج
حیدرآباد۔ 19 نومبر (سیاست نیوز) صدر پردیش کانگریس مہیش کمار گوڑ نے کہا کہ آنجہانی اندرا گاندھی نے خواتین کو ہر سطح پر خود مکتفی بنانے اور معاشی طور پر مستحکم کرنے کے لئے انقلابی قدم اٹھائے تھے۔ سابق وزیر اعظم کی یوم پیدائش کے موقع پر مہیش کمار گوڑ نے اچم پیٹ اسمبلی حلقہ میں اندرا گاندھی کے مجسمہ پر گلہائے عقیدت پیش کئے۔ رکن اسمبلی ڈاکٹر ومشی کرشنا اور مقامی کانگریس قائدین کے ہمراہ مہیش کمار گوڑ نے تقریب میں شرکت کی۔ انہوں نے کہا کہ آج بھی غریبوں اور خواتین میں اندرا گاندھی کو یاد کیا جاتا ہے اور غریبوں کی بھلائی کے لئے انہوں نے جن اسکیمات کا آغاز کیا آج بھی وہ جاری و ساری ہیں۔ خاتون آہن کے طور پر اندرا گاندھی نے اپنی شناخت بنائی اور دشمن ممالک کو مناسب سبق سکھایا تھا۔ وزیر اعظم کی حیثیت سے اندرا گاندھی کی نمایاں خدمات پر انہیں بھارت رتن کے اعزاز سے نوازا گیا۔ مہیش کمار گوڑ نے کہا کہ تلنگانہ میں کانگریس حکومت اندرا گاندھی کے نظریات پر عمل پیرا ہے اور اقتدار کے صرف چند گھنٹوں میں آر ٹی سی میں مفت سفر کی سہولت کا آغاز کیا گیا۔ انہوں نے کہا کہ ملک کی اتحاد و سالمیت کے تحفظ میں آنجہانی اندرا گاندھی کا اہم رول رہا ہے۔ انہوں نے حکومت کی جانب سے غریب اور مستحق خواتین میں ساڑیوں کی تقسیم کا حوالہ دیا اور اسکیم کو کامیاب بنانے کی اپیل کی۔ مہیش کمار گوڑ نے مقامی قائدین کے ساتھ اجلاس میں پارٹی کی تنظیمی سرگرمیوں کا جائزہ لیا۔ 1
